VIQUEQUE, 20 maiu 2023 (TATOLI)—Relasiona ho komemorasaun loron restaurasaun independénsia Timor-Leste ba da- XXI, Reprezentante Prezidente Konsellu Veteranu munisípiu Viqueque, Daniel Sarmento ‘Fogeti’, prefere Governu foun tau a’as interese ba dezenvolvimentu nasionál.
“Ohin ita komemora loron restaurasaun independénsia ba da-XXI, ne’e ita selebra ho simples, diferente ho tinan sira seluk tanba liga mós ba ita-nia Eleisaun Parlamentár aban (21 maiu). Ita hotu partisipa iha eleisaun vota ho konsiénsia ema ida-idak. Bainhira partidu ida-ne’ebé manán no forma Governu foun karik, ami veteranu Viqueque ninia hakarak tenke tau interese ba dezenvolvimentu nasionál, labele tau interese ba pesoál ida-idak nian,” Daniel Sarmento hateten ba Agência Tatoli, iha resintu Administrasaun Viqueque, sabádu ne’e.
Notísia relevante : PM Taur: Traballadór nu’udar eroi foun iha faze dezenvolvimentu nasionál
Veteranu Viqueque prefere Governu foun kontinua programa sira hosi Governu anteriór ne’ebé husik hela.
“Se ita husik programa sira-ne’ebé Governu anteriór halo maka husik hela de’it, halo fali buat seluk ne’e ita gasta osan. Ha’u fó ezemplu uluk Governu anteriór nian hanesan projetu tasi mane. Ami sente di’ak no promete ba ami veteranu katak tinan 2025 mina mai ona Beaço, maibé ha’u haree labele realiza, ami nafatin fó apoiu másimu ba programa ne’e,” nia akresenta.
Ho ida-ne’e, nia sujere ba Governu foun kontinua implementa Planu Estratéjiku Dezenvolvimentu Nasionál (PEDN) 2011-2030 nian.
Jornalista : Vitorino Lopes da Costa
Editora : Julia Chatarina
