VIQUEQUE, 21 maiu 2023 (TATOLI)—Eleisaun Parlamentár 2023 iha suku Macadique, postu administrativu Uatulari, munisípiu Viqueque la’o normál.
“Ohin ha’u akompaña Eleisaun Parlamentár iha sentru votasaun sira iha suku Macadique la’o normál tebes no hetan seguransa hosi Polísia Nasionál Timor-Leste (PNTL) Eskuadra Uatolari, Unidade Polísia, Batallaun Orden Públika (BOP) inklui FALINTIL-Forsa Defeza Timor-Leste (F-FDTL) ne’ebé halo patrullamentu ba eleisaun,” Reprezentante Xefe suku Macadique no atuál Xefe Juventude suku, Muhamad Nur Hidayat, hateten ba Agência Tatoli, iha sede suku Macadique, domingu ne’e.
Muhamad dehan, joven balun konsumu alkool hodi hamosu reasaun ruma maibé autoridade konsege hakalma kedas situasaun.
“Ami konsege atende, nune’e daudaun ne’e ita haree situasaun iha suku laran no iha sentru votasaun sira hakmatek. Eleitór sira hosi suku Macadique hotu hakbesik ba sentru votasaun hodi ezerse sira-nia diretu,” nia akresenta.
Notísia relevante : Materiál Eleisaun Parlamentár kaixa 12 to’o iha Viqueque
Ho nune’e, nia husu eleitór sira hosi suku Macadique tenke mantein unidade no pás hodi bele asegura prosesu eleisaun.
“Biban ne’e, ha’u hakarak apela ba komunidade suku Macadique, ita presiza matein pás hodi ita bele asegura ita-nia eleisaun la’o hakmatek. Ita labele halo barullu, labele hafuhu malu no labele halo intidimidasaun ba malu atu ita-nia situasaun eleisaun tinan ne’e la’o di’ak,” Xefe juventude fó hanoin.
Nia iha esperansa, formasaun Governu foun tenke implementa promesa sira-ne’ebé durante kampaña partidu polítiku sira promete ba povu.
“Ami suku Macadique ninia peioridade maka dalan, bee-moos no eletrisidade tanba dalan ne’ebé liga bá ami-nia aldeia neen hanesan Bubulita, Digamasi, Luru-Boru, Borubai, Keturia no Matadalan ne’ebé iha área rurál seidauk di’ak. Ami-nia aldeia neen ne’ebé iha área rurál ho totál uma-kain 30 resin maka seidauk asesu eletrisidade no bee-moos seidauk sufisiente,” Reprezentante Autoridade suku hato’o.
Suku Macadique estabelese sentru votasaun ualu no estasaun votu sia, ho totál eleitór 4.172.
Jornalista : Vitorino Lopes da Costa
Editora : Julia Chatarina
