BOBONARO, ELEISAUN, HEADLINE, MUNISÍPIU, POLÍTIKA

PNTL asegura sidadaun na’in-rua hosi Indonézia vota iha Bobonaro

PNTL asegura sidadaun na’in-rua hosi Indonézia vota iha Bobonaro

Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

MALIANA, 21 maiu 2023 (TATOLI)-Polísia Nasionál Timor-Leste (PNTL), komandu munisípiu Bobonaro, domingu ne’e asegura sidadaun mane na’in-rua hela iha Atambua, Indonézia mai tuir votasaun iha postu administrativu Balibo no postu administrativu Maliana, munisípiu Bobonaro.

Komandante PNTL Munisípiu Bobonaro, Superintendente Xefe Antoninho Mauluta, esplika, bazea ba rezultadu investigasaun sidadaun na’in-rua ne’e ida tuir votasaun iha aldeia Ferik-Katuas, suku Leohitu, postu administrativu Balibó  no ida seluk vota iha  aldeia Oplegul, suku Holsa, maibé nia rezidénsia loloos iha suku Tapo-Memo, postu administrativu Maliana.

Sidadaun na’in-rua ne’e PNTL asegura tanba hetan kontaktu hosi Komisaun Nasionál Eleisaun (CNE, sigla portugués) bazea ba informasaun ne’ebé relata hosi abitante lokál sira.

Notísia relevante: PNTL hahú investiga fiskal KHUNTO vota doubru iha Malilait

“Ita-nia ema, nu’udar ita-nia sidadaun, ne’ebé durante sira hola feto hela iha Indonézia, maibé sira sei nafatin sidadaun Timor-Leste, sira sei kaer nafatin kartaun eleitorál, ida-ne’e mak sira lori hakat mai partisipa iha eleisaun, maski sira tama mai tuir dalan ilegál,” nia informa ba jornalista sira, iha Maliana, domingu ne’e.

Komandante Mauluta, konfirma daudaun ne’e parte investigasaun kriminál konklui ona prosesu identifikasaun no aban sei submete ba Ministériu Públiku.

“ita hein depois Ministériu Púbñiku hasai notifikasaun mai, atu ba partisipa iha primeiru interrogatóriu, iha prosesu kontinuasaun tuir mai mak ita foin bele hatene, nia kona grave ne’e iha-ne’ebé, tanba kartaun eleitorál ne’e ka ou nia mai tama hosi dalan ilegál,” nia Katak

Enkuantu sidadaun na’in-rua ne’e daudaun ne’e ida asegura hela iha komando polísia munisípiu Bobonaro no ida seluk iha hela eskuadra Balibó.

Notísia relevante: CNE Bobonaro husu ofisiál eleitorál 1.700 iha serbisu ho imparsiál

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!