BOBONARO, 21 maiu 2023 (TATOLI)-Polísia Nasionál Timor-Leste (PNTL), Eskuadra Bobonaro halo hela investigasaun ba fiskal partidu Kmanek Haburas Unidade Nacional Timor Oan (KHUNTO) ho inisiál CS (27), ne’ebé deskonfia vota doubru iha suku Malilait, postu administrativu Bobonaro, munisípiu Bobonaro.
Tuir informasaun ne’ebé Agência Tatoli rekolla iha terrenu, katak fiskal (fiskal) ne’e ezerse nia votu dahuluk iha estasaun votu Taimea, suku Mali-Lait.
Hafoin ne’e vota tán iha sentru votasaun Eis Eskola Xina Mailu, suku Mali-Lait, mak fiskal hosi Partidu CNRT mak identifika tanba hetan sidadaun ne’e liman tinta metan ona.
Nune’e iha tuku 08:00 Polísia eskudra Bobonaro asegura kedas sidadaun refere no transporta ba komandu Polísia Munisípiu Bobonaro atu loke prosesu investigasaun.
Notísia relevante: CNE Bobonaro husu ofisiál eleitorál 1.700 iha serbisu ho imparsiál
“Oras ne’e daudaun prosesu la’o hela, iha prosesu ne’e ita atu hare ninia lalaok no falla ne’e iha-ne’ebé. Ida-ne’e mak depois kazu ne’e ita sei lori ba aprezenta ba Ministériu Públiku,” Komdante PNTL, Munisípiu Bobonaro, Superintendente Xefe Antoninho Mauluta, ko’alia iha Maliana, domingu ne’e.
Vise Prezidente CNE, Domingos Barreto, konsidera aktu ne’e krime grave.
“Krime ida-ne’e previstu iha artigu 229 to’o 41, ema-ne’ebé tenta vota dala rua, kazu ida-ne’e la’ós investiga nia de’it, sei investiga mós sira hosi STAE ne’ebé maka fasilita nia tama ba vota,” nia hateten.
Sidadaun ne’e asegura hela iha komandu polísia munisípiu Bobonaro hodi hein prosesu investigasaun tuir mai.
Notísia relevante: PNTL Bobonaro sei asegura materiál eleisaun nu’udar entidade alta
Jornalista: Sérgio da Cruz
Editór: Evaristo Soares Martins
