MALIANA, 20 maiu 2023 (TATOLI)-Komandu Polísia Nasional Timor-Leste, Munisípiu Bobonaro, sábadu ne’e halo formatura jerál hodi koloka membru efetivu sira ba asegura eleisaun parlamentár iha sentru votasaun 150 no estasaun de votu 170 ne’ebé establese iha suku 50, postu administrativu neen.
Hafoin komanda parada, Komandante Polísia Munisípiu Bobonaro, Superintendente Xefe, Antonino Mauluta, hateten serimónia parada ne’e atu orienta membru sira serbisu ho disiplina, profisionál tuir misaun no vizaun PNTL nian atubele garante no asegura pás, establidade iha rai-laran durante prosesu eleisaun la’o.
Enkuantu efetivu hirak-ne’e na’in 50 mai hosi Unidade Patrullamentu Fronteira (UPF) no membru Task-Force, unidade sira inklui Ofisiál Polísia Suku (OPS).
Notísia relevante: PNTL Bobonaro sei apoia UPF kontrola fronteira iha loron eleisaun
“Ita hotu-hotu tenke asegura materiál sensitivu sira, sasán sira-ne’e hanesan ita-nia ulun-boot balun mak iha-ne’ebá, ita halo seguransa ne’e hanesan ita-nia nai ulun-boot sira, hanesan Primeiru Ministru, Prezidente Parlamentu no ita-nia ministru sira hotu mak ita ohin loron mak ita halo seguransa ba, ita labele haree katak ne’e hanesan surat-tahan babain, maibé ne’e importante ba ita-nia nasaun,” nia hateten.
Komandante ne’e orienta membru sira atu serbisu hamutuk ho parte hotu-hotu nune’e bele fó susesu ba eleisaun parlamentár tinan ne’e.
Superintendente Xefe ne’e hatutan, maske rekursu umanu ne’ebé koloka ba sentru votasaun sira ladún sufisiente, maibé PNTL nafatin firme atu serbí no la tolera grupu ka individu ne’ebé tenta prátika aktu krime hodi perturba prosesu votasaun.
“imi atua tuir lei ne’ebé fo dalan, labele tauk, hateten de’it ami mai ne’e halo orden, asegura sentru ida-ne’e to’o votasaun remata,” nia apela.
Enkuantu durante efetivu sira halo misaun iha sentru votasaun idalk-idak, membru sira hosi Batallaun Orden Públika (BOP) mak sei halo patrullamentu másimu hodi atende, karik akontese situasaun emerjénsia ruma iha kapitál Maliana no postu administrativu sira.
Entertantu Polísia Komandu Munisípiu Bobonaro mos sei kontinua fó seguransa hahú hosi prosesu apuramentu rezultadu iha nivél munisipál no sei reitira hafoin tranporta rezultadu ba halo apuramentu iha nasionál.
Notísia relevante: STAE Bobonaro distribui materiál eleisaun ba sentru votasaun 150
Jornalista: Sergio da Cruz
Editór: Evaristo Soares Martins
