MALIANA, 24 abríl 2023 (TATOLI) – Polísia Nasionál Timor-Leste (PNTL) Munisípiu Bobonaro sei apoia Unidade Patrullamentu Fronteira (UPF) atu kontrola no aperta liután seguransa iha liña fronteira terrestre durante kampaña to’o loron eleisaun.
Komandante PNTL Munisípiu Bobonaro, Superitendente Xefe Antoninho Mauluta, haktuir iha loron 23 abríl ne’e instituisaun seguransa no defeza konvoka enkontru konsellu komandu entre PNTL, UPF, Batallaun Orden Públika (BOP, Komandu Operasaun Espesiál (COE) no FALINTIL-Forsa Defeza Timor-Leste (F-FDTL).
Enkontru ne’e rasik ko’alia foka liubá oinsá atu prepara planu operasaun no halo liña koordenasaun durante eleisaun parlamanetár iha territóriu munisípiu Bobonaro inklui iha liña fronteira hodi minimiza movimentasaun ilegál
Notísia relevante:PNTL Bobonaro firme asegura kampaña eleitorál
“Agora daudaun ita junta tanba UPF sira mós husu apoiu fali mai, ami mós tenke iha fali kotuk tanba ita-nia fronteira ne’e luan husi Mota-Ain ba to’o iha Alto Lebos, liu ba to’o Mota-Masin dook la halimar,” nia hateten asuntu ne’e iha durante enkontru ho líder partidu polítiku, observadór no mídia sira iha salaun STAE, munisípiu Bobonaro, segunda ne’e.
Razaun parte autoridade seguransa no defeza halo kontrola iha rai-ketan sira ne’e tanba sidadaun sira-ne’ebé hela iha liña froneteira entre munisípiu Bobonaro no Atambua, Kabupaten Belu, Provínsia Nusa Tenggara Timor (NTT) sei iha relasaun família nune’e sempre tama mai ho ilegál hodi partisipa eventu kulturál no seluk tán.
Komandante ne’e akresenta, tuir imformasaun katak iha eleisaun prezidensiál tinan kotuk sidadaun balun hosi Indonézia hakat ilegál mai tuir votasaun iha suku Hauba, maibé autoridade seguransa iha liña fronteira la konsege deteta, nune’e iha tinan ne’e sei aperta liután fronteira.
“Ita tenke prevene liuliu ilegál ne’e, tanba ne’e mak ita husu ba xefe aldeia sira no komunidade tomak, hetan imformasaun ruma karik pasa informasaun mai lalais, ita hotu hotu tenke tau-matan lisuk,” nia apela.
Notísia relevante: IKS, PSHT no Kolimau 2000 sei apoia PNTL Bobonaro garante pás iha kampaña eleitorál
Jornalista : Sérgio da Cruz
Editór : Evariso Soares Martins
