MALIANA, 20 maiu 2023 (TATOLI)- Sekretariadu Tékniku Administrasaun Eleitorál (STAE) Munisípiu Bobonaro, sábadu ne’e distribui ona materiál eleisaun Parlamentár ba sentru votasaun hamutuk 150 no estasaun votu 170 iha postu administrativu neen.
Serimónia distribuisaun ne’e hala’o iha edifísiu STAE Bobonaro ne’ebé loke ofisialmente hosi prezidente Autoridade Munisípiu Bobonaro, Ernesto de Oliveira Barreto no asina termu entrega hosi Diretór STAE Bobonaro, Mariano Viegas Amaral ba Komandante PNTL Bobonaro, Superintendente Xefe Antoninho Mauluta no sasin hosi Komisáriu CNE destakadu munisípiu Bobonaro, Domingos Barreto.
Notísia relevante: STAE Bobonaro konklui verifikasaun ba boletín votu kaixa 15
Prezidente Autoridade Munisípiu Bobonaro, Ernesto de Oliveira Barreto, husu eskipa STAE no CNE atu serbisu ho profisionál no responsabilidade tanba xave ba susesu eleisaun iha órgaun administrasaun eleitorál nia liman.
“Materiál sentsitivu dezloka ba sentru votasaun ne’e responsablidade ita-boot sira nian, la’ós ba preokupa ona ho facebok, hemu tua lanu de’it, depois hakfodak mai material balu ema lori sees estraga tiha ne’e problema boot, ita haree ne’e hanesan kaisa mamuk, maibé ne’e esensiál atu determina futuru rai ida-ne’e nia futuru,” nia hateten.
Diretór STAE Munisípiu Bobonaro, Mariano Viegas Amarál, esplika prosesu distribuisaun ne’e nu’udar faze determinante hosi preparasaun lubuk ida, tanba ne’e alerta ba bgrigada no ofisial supervizaun eleitorál sira atu serbisu tuir lei no lema ne’ebé hatuur ona katak, demokrasia, imparsialidade, transparánsia no neutralidade.
“Ami hanesan orgaun ezekutadór ba aktvidade eleisaun iha territóriu munisípiu Bobonaro, husu nafatin tulun hosi autoridade lokál atubele apoia ami másimu iha prosesu ida-ne’e, nune’e eleisaun bele la’o ho efikasia no efisiénsia,” Mariano katak.
Komisáriuu CNE destakadu munisípiu Bobonaro, Domingos Barreto, apela ofisiál eleitorál sira atu hatudu serbisu tuir lei no tau-aas liu interese nasionál atu nune’e bele promove ba mundu katak demokrasia Timor-Leste iha nível Ázia sei di’akliu nasaun sira seluk.
“Kuandu foti boletín votu haree ku’ak ne’e iha-ne’ebé, sala ka loos ida-ne’e mak tenke ser hatete,;labele koko atu halo manobra, aumenta votu kuidadu didiak, tanba ne’e responsablidade pesoál, la’ós reponsablidade instituisionál. Ema-ne’ebé atu sai deputadu ne’e lista iha tiha ona, sé imi balu halo oinoin ba moos la bele hetan ona, ne’ebé serbisu ho lolos, keta halo, eleisaun hotu deputadu sira ba iha parlamentu, ita-boot sira ba hatán iha tribunál, depois ba komarka,” nia apela.
Materiál hirak-ne’e transporta ho viatura hamutuk 50-resin, komposta hosi karreta estadu ne’ebé hetan apoia hosi diresaun patrimóniu estadu, autoridade munisípiu no karreta aluga.
Enkuantu durante prosesu mobilizasaun material hirak-ne’e kada karreta hetan seguransa másima hosi PNTL, akompaña hosi brigadista sira no ofisiál supervizaun CNE.
Notísia relevante: STAE Bobonaro aluga viatura 32 transporta materiál eleisaun
Jornalista : Sérgio da Cruz
Editór : Evaristo Soares Martins
