Povu Baucau husu governasaun foun aselera dezenvolvimentu to’o rurál
BAUCAU, 21 maiu 2022 (TATOLI) – Povu munisípu Baucau husu ba partidu polítiku sira-ne’ebé ukun iha governasaun foun mai atu aselera dezenvolvimentu ba povu to’o área rurál.
Prezidente Komunidade Musulmanu Baucau, Samsul Bahri Ribeiro, nota, eleisaun parlamentár iha munisípiu Baucau hala’o ho situasaun hakmatek nune’e povu-nia esperansa mak governasaun foun mai presiza fó atensaun ba kondisaun moris liuliu hadi’a ekonomia rai-laran no lori dezenvolvimentu to’o rurál.
“Povu halerik ba buat sira-ne’e hotu, hasa’e produsaun agrikultura nune’e redús importasaun,” Samsul Bahri Ribeiro hateten iha Vila Nova, domingu ne’e.
Setór sira-ne’ebé ensensiál mak hanesan povu-nia nesesidade hanesan setór edukasaun, saúde inklui ekonomia no seguransa rai-laran liuliu iha munisípiu Baucau.
Xefe departamentu Emerjénsia Ospitál Rejionál Eduardo Ximenes (HoREX, sigla portugés) Baucau, Claudino Ximenes, espera governasaun foun mai bele halo infraestrutura fízika iha baze hanesan estrada, bee-moos no eletrisidade ne’ebé durante ne’e povu rurál seidauk asesu.
“Governasaun foun bele mós prepara di’ak liután fasilidade hodi hasa’e kualidade saúde ba komunidade sira,” Claudino Ximenes hateten.
Bainhira infraestrutura saúde hadi’a hotu iha fatin-fatin, presiza aumenta tán rekursu umanu hanesan destaka profisionál saúde sira to’o rurál nune’e hakbesik saúde ba komunidade tuir Planu Estratéjiku Dezenvolvimentu Nasionál (PDN).
“Ita la husu governante sira fó buat oin-oin maibé hein de’it infraestrutura sira atu fasilita sira halo aktividade,” Claudino argumenta.
Observasaun Agência Tatoli iha terrenu nota, sentru votasaun iha Baucau Vila hahú loke oras 07:00 dadeersan no komunindade sira ho entusiazmu partisipa iha eleisaun parlamentár ne’ebé iha ámbitu pás no hakmatek no hetan kontrolu másimu hosi parte autoridade seguransa.
Tótal eleitór iha munisípiu Baucau hamutuk 99.158 hosi sentru votasaun hamutuk 150 no estasaun votu hamutuk 180.
Notísia relevante: Povu nia votu determina futuru nasaun
Jornalista : Natalino Belo
Editór : Evaristo Soares Martins
