Apuramentu finál iha Viqueque, FRETILIN lidera ho votu 46,93%
VIQUEQUE, 22 maiu 2023 (TATOLI)—Sekretariadu Tékniku Administrasaun Eleitorál (STAE) munisípiu Viqueque, segunda ne’e, konklui apuramentu ba Eleisaun Parlamentár 2023, hosi sentru votasaun 112 no estasaun votu 135 iha Viqueque.
“Ohin ami konklui ona prosesu apuramentu munisípiu Viqueque nian, nune’e rezultadu hosi Partidu FRETILIN ho votu 21.276 (46,93%), tuir fali maka Partidu CNRT iha pozisaun daruak ho votu 10.609 (23,40%),” Prezidente meza ba apuramentu munisípiu Viqueque no atuál Diretór STAE Viqueque, Humberto Fernandes, informa ba Agência Tatoli, iha salaun apuramentu munisipál.
Partidu PDN 32 (0,07%), PLPA 338 (0,75%), PLP 2.879 (6,35%), PD 1.957 (4,32%), KHUNTO 3.075 (6,35%), PVT 2.043 (4,51%), UDT 61 (0,13%), PUDD 2.009 (4,43%), PR 237 (0,52%), UNDRT 79 (0,17%), CASDT 124 (0,27%), MPLM 42 (0,09%), PST 245 (0,54%), PDC 90 (0,20%) no PAPMT 240 (0,53%).
Notísia relevante : Materiál Eleisaun Parlamentár kaixa 12 to’o iha Viqueque
Totál eleitór rejistadu hamutuk 58.566, eleitór ne’ebé partisipa votasaun 46.228, ho taxa partisipasaun 78,93%, votu nulu 671 (1,45%), votu branku 191 (0,41%), votu reklamadu 17 (0,04%) no votu rejeitadu 11 (0,02%) no totál votu válidu 45.336 (98,07%).
“Ami hahú halo apuramentu desde horiseik (domingu 21/05) maizumenus tuku 18:45 to’o ramata,” nia akresenta.
Biban ne’e, Diretór STAE agradese ba parte Polísia Nasionál Timor-Leste (PNTL) no FALINTIL-Forsa Defeza Timor Leste (F-FDTL), ne’ebé fó apoia másimu ba Eleisaun Parlamentár.
Tuir planu, aban (23/05) tuku 08:00 sei distribui rezultadu apuramentu munisípiu Viqueque ba Komisaun Nasionál Eleisaun (CNE, sigla portugés) hodi kontinua halo apuramentu nasionál.
Atividade ne’e akompaña hosi CNE Viqueque, Autoridade seguransa no defeza, observadór nasionál no internasionál inklui fiskál partidu polítiku sira.
Jornalista : Vitorino Lopes da Costa
Editora : Julia Chatarina
