OÉ-CUSSE, 22 maiu 2023 (TATOLI) – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), segunda ne’e konklui ona apuramentu rejionál ho rezultadu finál lidera direitamente hosi partidu Kongresu Nasionál Rekonstrusaun Timorense (CNRT) manán ho votu 19,624 (44,78%).
Notísia relevante: Rezultadu nasionál Elpar 2023, provizoriamente CNRT lidera ho votu 63.398
Prezidente Assembleia Apuramentu Rejionál atuál Diretora STAE Oé-Cusse, Luiza da Costa, anúnsia rezultadu apuramentu katak, totál akta ne’ebé STAE Oé-Cusse rejista ba apuramentu rejionál ne’e hamutuk 80 mai hosi sentru votasaun 80 no estasaun votasaun 115.
Nune’e partidu manán daruak okupa hosi Partidu Frente Revolusionária Timor-Leste Independente (FRETILIN) ho votu 15,382 (35,10%), PD 2.625 (5,99%), KHUNTO 1,957 (4,47%), PLP 1,160 (2,65%), PUDD 1.775 (4,05%).
Nune’e mós hosi partidu PLPA 379 (0,86%), Partidu Os Verde de Timor 271 (0,62%), CASDT 191 (0,44%), APMT 143 (0,33%), PR 66 (0,15%), UNDERTIM 56 (0,13%), MPLM 30 (0,07%), PST 60 (0,14%), PDC 32 (0,07%), UDT 60 (0,14%) no PDN 17 (0,04%).
“Apuramentu eleisaun parlamentár iha Oé-Cusse, ohin termina ona, hahú horisehik tuku 21:00 kalan no ohin remata iha tuku 15:00 lorokraik ne’e,” Prezidente Apuramentu Rejionál, Luiza da Costa, fó sai iha salaun apuramentu Alfándega, Palaban, Oé-Cusse.
Nia hatutan, totál eleitór ne’ebé rejista atu partisipa iha eleisaun parlamentár ne’e, hamutuk 54,291, sira-ne’ebé vota hamutuk 44,313 ho taxa partisipasaun hamutuk 81,62%,
Purtantantu, totál votu nulu hamutuk 366 (0,83%), votu branku 84 (0,19%), votu reklamadu 29 (0,07%), bo votu rejeitadu hamutuk 3 (0,01%), nune’e totál votu válidu hamutuk 43,828 (98,91%).
Komandante Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), Superintendente Xefe Polísia, Mateus Assunção Mendes, agradese ba povu Oé-Cusse, tanba konstribui hodi garante pás-estabilidade durante eleisaun parlamentár.
Nia informa, antes ne’e komandu PNTL Oé-Cusse, destaka efetivu sira hamutuk 135 aumenta ho efetivu na’in-40 hosi Polísia Unidade Fronteira (UPF), no na’in-10 hosi Polísia Unidade Espesiál (UEP) hodi destaka iha sentru votasaun 80 no estasaun votasaun 115 iha territóriu Oé-Cusse,
Aliende ne’e mós hetan apoia hosi FALINTIL-Forsa Defeza Timor-Leste (F-FDTL) Polísia Unidade Marítima (UPM) no Autoridade Protesaun Sivíl (APC, sigla portugés).
“Komesa distribuisaun materiál ba iha sentru votasaun sira, to’o horisehik eleisaun hotu fila-fali iha apuramentu rejionál, ho situasaun hakmatek no kontroladu laiha insidente ruma rejistu iha eleisaun ne’e to’o prezente data,” nia orgullu.
Entretantu, tuir planu STAE Oé-Cusse, sei dezloka rezultadu apuramentu rejionál Oé-Cusse ba nasionál iha Dili iha loron tersa 23 maiu, semana ne’e.
Notísia relevante: FRETILIN lidera provizória kontajen votu iha munisípiu Baucau
Jornalista: Abílio Elo Nini
Editór: Evaristo Soares Martins
