PD prontu serbí povu ho dalan saida de’it
DILI, 23 maiu 2023 (TATOLI)—Sekretáriu Jerál Partidu Demokrátiku (PD), António da Conceição ‘Kalohan’, hateten, partidu repeita demokrasia no respeita vontade hosi partidu seluk ba PD rasik.
“Bainhira ita haree katak matan monu ba Partidu Demokrátiku hodi sai belun di’ak ba vida nasaun nian, ida-ne’e mós Partidu Demokrátiku hein, maibé ho votu 60.359, ami tenke dehan ona katak ami tenke serbí povu, serbí ho dalan saida de’it, ida-ne’e sei ko’alia ho ida-ne’ebé sai vensedór,” Sekretáriu Jerál partidu hateten ba jornalista sira iha sede PD Colmera, tersa ne’e.
Notísia relevante : PD apela militante sira hakmatek hodi rona rezultadu eleisaun
Kalohan hato’o lia hirak ne’e relasiona ho posibilidade partidu vensedór Eleisaun Parlamentár 2023, Congresso Nacional Reconstrução de Timorense (CNRT) konvida forma IX Governu Konstitusionál.
Nia dehan, PD respeita povu nia desizaun, nune’e sei iha mós opsaun hosi partidu rasik.
“PD hamriik hela iha nia fatin, baibain kuandu situasaun difísil ne’e ema halai mai atu dere partidu ne’e nia odamatan, maibé agora ami tenke halo rasik opsaun, dahuluk mak ami tenke respeita povu nia lian ne’ebé mak tatoli ona liuhosi partidu ne’ebé bele dehan vensedór (CNRT) la’ós ida-ne’ebé manán mutlak, maibé ida-ne’ebé ita bele dehan sura ba mais votadu tiha ona. PD la presiza hein ona atu sé mak atu mai dere odamatan maibé PD tenke halo opsaun ba uluk lai povu, ne’e signifika hambriik daudaun ona ho ida-ne’ebé povu titip ninia votu,” Kalohan tenik.
Nia subliña, PD sei la fó opsaun ba partidu vensedór maibé sei aprezenta estrutura Governu ne’ebé bele reflete saida mak durante ne’e hato’o iha kampaña, la’ós internál partidu ne’e de’it maibé sei rona partidu seluk nia lian hodi aprezenta estrutura ne’ebé bele responde ba promesa hotu.
“Bainhira ba hamutuk ho CNRT, PD la fó opsaun tanba ami mós la’ós esperiénsia dahuluk ho CNRT nia ukun, ami ukun hamutuk tiha ona durante tinan-10, depois hamutuk filafali hanesan opozisaun iha tinan hirak nia laran, ne’ebé ami hatene katak ho ida-ne’ebé manán ona ne’e la presiza atu ko’alia, sira hatene ami ona, ne’ebé seidauk iha desizaun ida maibé desizaun informál ne’e desde uluk ami ko’alia ona, maibé atu deside formalmente sei hein desizaun bainhira fó sai ona rezultadu eleisaun nian,” nia dehan tan.
Iha sorin seluk, estrutura tomak PD hakarak fó agradesimentu ba povu Timor-Leste tomak.
“Ita hotu la’o hakat ona katak vota hotu ona, daudaun iha hela prosesu apuramentu tanba ne’e nafatin husu hotu-hotu pasiénsia hodi hein saida mak atu mai, ida-ne’ebé mak atu mai ne’e hanesan ida-ne’ebé mak imi rasik hili. Tanba ne’e ha’u husu povu hotu hakmatek,” Sekretáriu Jerál partidu salienta.
Nia mós husi ba líder sira ne’ebé daudaun hamriik iha partidu sira atu hakmatek hodi hein rezultadu ikus, nune’e bele dignifika povu nia desizaun.
Rezultadu provizóriu Eleisaun Parlamentár 2023 partidu vensedór mak Partidu CNRT ho votu hamutuk 288.101 (41,62%)ho kadeira 31, tuir fali mak Partidu FRETILIN ho votu 178.248 (25,75%) ho kadeira 19, PD ho votu 64.493 (9,32%) ho kadeira 6, KHUNTO ho votu 52.021 (7,52%) kadeira 5, no PLP ho votu 40696 (5,55%) ho kadeira haat.
Jornalista : Antónia Gusmão
Editora : Julia Chatarina
