STAE Viqueque transporta ona rezultadu apuramentu ba nasionál

VIQUEQUE, 23 maiu 2023 (TATOLI)—Sekretariadu Tékniku Administrasaun Eleitorál (STAE), munisípiu Viqueque, tersa ne’e, transporta ona rezultadu apuramentu munisípiu Viqueque hosi Eleisaun Parlamentár 2023 bá nasionál.

“Loloos ami lori horiseik maibé rai kalan ona, entaun ami deside hamutuk ho ekipa sira, nune’e ohin ami lori rezultadu apuramentu munisipál hanesan materiál sensitivu bá nasionál,” Diretór STAE munisípiu Viqueque, Humberto Fernandes, hateten ba Agência Tatoli iha salaun apuramentu munisípiu Viqueque.

Hafoin konklui apuramentu rezultadu finál iha munisípiu Viqueque, STAE hahú halo verifikasaun iha domingu (21/05) maizumenus hahú tuku 08:30 no ramata akta apuramentu munisipál, nune’e segunda tuku 05:00 kontinua transporta urna inklui materiál sensitivu sira ba nasionál.

Notísia relevante : Apuramentu finál iha Viqueque, FRETILIN lidera ho votu 46,93%

Munisípiu Viqueque rejista sentru votasaun hamutuk 112 no estasaun 135, eleitór rejistadu 58.566, eleitór ne’ebé partisipa votasaun 46.228, taxa partisipasaun 78,93%, votu nulu 671 (1,45%), votu branku 191 (0,41%), votu reklamadu 17 (0,04%), votu rejeitadu 11 (0,02%) no votu válidu 45.336 (98,07%).

Rezultadu apuramentu munisípiu Viqueque Partidu FRETILIN ho votu 21.276 (46,93%), CNRT ho votu 10.609 (23,40%), KHUNTO 3.075 (6,35%) no PLP 2.879 (6,35%).

Enkuantu, Partidu PDN 32 (0,07%), PLPA 338 (0,75%), PD 1.957 (4,32%), PVT 2.043 (4,51%), UDT 61 (0,13%), PUDD 2.009 (4,43%), PR 237 (0,52%), UNDRT 79 (0,17%), CASDT 124 (0,27%), MPLM 42 (0,09%), PST 245 (0,54%), PDC 90 (0,20%) no PAPMT 240 (0,53%).

Jornalista     : Vitorino Lopes da Costa

Editora          : Julia Chatarina