VIQUEQUE, 24 maiu 2023 (TATOLI)—Diretór Servisu Edukasaun munisípiu Viqueque, Domingos Brandão, husu ba estudante bolsa méritu atu kompleta dokumentu hodi hetan direitu hosi Ministériu Edukasaun Juventude no Desportu (MEJD).
“Ha’u husu ba inan aman no estudante sira ne’ebé hetan bolsa méritu, karik seidauk kompleta, presiza kompleta tanba sei hein to’o 31 jullu 2023. Tanba ne’e estudante sira ne’ebé sente seidauk karik tenke prepara dokumentu hodi hatama ba Servisu Edukasaun hodi prosesa,” Diretór informa ba Agência Tatoli, iha ninia knaar fatin, postu Viqueque Vila, kuarta ne’e.
Benefisiáriu bolsa méritu hosi pasajen 4a klase, pasajen 6a klase inklui 7o ano no 12o ano.
Notísia relevante : Pagamentu ba bolsa méritu hein publikasaun naran iha Jornal Repúblika
Tuir dadus, eskola hamutuk 232 iha Viqueque ne’ebé asesu programa bolsa méritu hosi Governu ho totál benefisiáriu hamutuk 1.163 ho alokasaun orsamentu $263.450, ne’ebé hosi númeru ne’e estudante 483 kompleta ona dokumentu bankáriu no estudante 680 seidauk kompleta.
“Ha’u husu ba dirijete eskola no inan aman sira atu tau-atensaun ba oan sira ne’ebé seidauk kompleta bankária, bele haree prepara dokumentu hodi kompleta daudaun ona tanba tempu sei iha,” nia akresenta.
Nia dehan, tempu badak nia laran ne’e estudante bolsa méritu bele ba foti ona sira-nia direitu.
“Ha’u hato’o mós ba inan aman sira, bainhira estudante sira-nia osan bolsa méritu sai karik, estudante sira maka tenke uza, labele ba fali kultura no bali buat sira-ne’ebé la folin ba estudante sira,” nia tenik.
Jornalista : Vitorino Lopes da Costa
Editora : Julia Chatarina
