Simeira Xefe Estadu CPLP sei realiza iha São Tome e Principe iha 27 agostu
DILI, 24 maiu 2023 (TATOLI)—Sekretáriu Ezekutivu Komunidade Nasaun Ko’alia Lian Portugés (CPLP, siglá portugés), Zacarias Albano da Costa, hateten simeira nível Xefe Estadu CPLP sei realiza iha nasaun São Tome e Principe iha 27 agostu 2023.
Notísia Relevante: Nasaun membru CPLP rekoñese Zacarias Albano susesu iha nia servisu
“Ohin mós, ko’alia kona-ba partisipasaun Prezidente Repúblika nian iha próxima simeira Xefe Estadu de Governu CPLP nian ne’ebé sei hala’o iha nasaun São Tomé e Príncipe iha 27 agostu oin mai,” Sekretáriu Ezekutivu CPLP, Zacarias Albano da Costa, hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kuarta ne’e.
Nia dehan, Governu foin daudaun propoin tan nia parte ba mandatu tinan rua to’o juñu 2025 bele kontinua nu’udar sekretáriu ezekutivu CPLP nian.
Durante tinan rua nia laran, nia buka merese konfiansa ne’ebé fó ba Governu no Prezidente Repúblika ho autoridade nasaun ne’e fó ba nia hodi hala’o kna’ar ho másimu no dedikasaun.
“Ba tempu oin tinan rua tan, ha’u hanoin hatudu tiha ona serbisu ne’ebé halo la’ós de’it ba Timor ba mós nasaun sira seluk. Ha’u hein katak iha simeira São Tomé e Príncipe iha 27 agostu mai ne’e, konfiansa ne’e bele fó nafatin hosi Xefe Estadu CPLP nian hodi ha’u bele kontinua tan tinan rua,” nia hateten.
Nia hateten, hanesan timoroan bainhira nai-ulun boot sira TL husu ka propoin para sai nu’udar sekretariu ezekutivu CPLP nian, importante TL hatudu ba nasaun sira seluk CPLP nian no hatudu mós ba mundu tomak katak TL mós bele iha kuadru no bele dirije organizasaun internasionál ida hanesan CPLP.
Sekretáriu Ezekutivu CPLP ne’e seidauk fó sai detallu kona-ba ajenda saida de’it mak sei diskute iha simeira nível Xefe Estadu CPLP ne’ebé tuir planu sei realiza iha iha nasaun São Tome e Principe iha 27 agostu 2023.
Jornalista : Nelson de Sousa
Editór : Cancio Ximenes
