OÉ-CUSSE 25 maiu 2023 (TATOLI) – Funsionáriu na’in-27 hala’o kna’ar iha Diresaun Rejionál Edukasaun Rejiaun Administrativa Espesiál Oé-Cusse Ambeno (RAEOA), submete ona proposta rekerimentu iha Komisaun Funsaun Públika (KFP) hakarak atu reforma tanba idade liu ona 60.
Notísia relevante: Funsionáriu reforma la depende ba idade maibé rekerimentu
Xefe Departamentu Rekursu Umanu iha Edukasaun Oé-Cusse, João Bobo, esplika, funsionáriu na’in-27 ne’e submete ona pedidu reketimentu iha edukasaun rejionál hodi enkamiña ba iha Komisaun Funsaun públika (KFP) hodi hetan despaxu sertifikasaun reforma.
Nune’e, funsionáriu hirak-ne’e sei kontinua hala’o kna’ar nu’udar servidór Estadu, hodi hein despaxu hosi Komisaun Funsaun Públika, maske idade liu ona 60.
“Proposta rekerimentu ne’ebé sira hatama mai iha 2021 na’in-hitu (7), 2022 iha na’in-20, hakarak reforma iha 2023 ne’e, ne’ebé agora daudaun lista ne’ebé iha edukasaun hamutuk na’in-27, mak submete ona iha funsaun públika atu prosesa,” João Bobo, informa ba Agência Tatoli iha Oé-Cusse, kinta ne’e.
Nia esplika, bazea regulamentu lei reforma nian iha parte edukasaun, katak, idade avansadu atu remata hodi reforma ne’e seidauk iha, só ida-ne’ebé, hakarak atu reforma, presiza hato’o proposta rekerimentu ba Komisaun Funsaun Públika.
Rekerimentu mai liuhosi edukasaun tanba sira hala’o serbisu iha Ministériu Edukasaun, depois mak edukasaun entrega ba Komisaun Funsaun Públika, verifika tiha, entrega fila-fali mai edukasaun, maka foin autoriza reforma atu asina formuláriu primeiru no segundu, atu hetan despaxu reforma hosi Komisaun Funsaun Públika.
“Ne’ebé agora ita hein de’it, despaxu, biar idade liu 60, maibé kuandu seidauk iha proposta rekerimentu ba reforma, entaun nia obrigasaun tenke kontinua nia kna’ar hanesan servidór Estadu, sei hatama ona pedidu mai, maibé sei hein despaxu atu hetan sertifikadu reforma ho pensaun tuir kondisaun ne’ebé iha,” nia afirma.
“Agora sira na’in-27 ne’e, ami submete ona na’in-11 ba KFP, maibé iha na’in-lima de’it mak tinan ne’e ba asina formuláriu reforma ne’e, maibé despaxu atu reforma ne’e maka seidauk iha to’o agora, ne’ebé sira sei kontinua ativa hanesan bainbain,” nia katak.
Nia apela ba funsionáriu sira-ne’ebé hala’o kna’ar iha setór edukasaun nian, karik idade tama ona ba 60, tantu rejime jerál no rejime espesiál hakarak reforma presiza submete proposta rekerimentu, la’ós obrigasaun maibé depende idak-idak nian.
Notísia relevante: Komisaun A submete paresér lejislativa limitasaun idade reforma ba funsionáriu públiku
Jornalista : Abílio Elo Nini
Editór : Evaristo Soares Martins
