DILI, 25 maiu 2023 (TATOLI)–Ministru Obra Públika, Abel Pires da Silva, kinta ne’e, relata informasaun ba Primeiru-Ministru, Taur Matan Ruak, liga ho preparasaun ba lansamentu projetu reabilitasaun estrada iha munisípiu tolu.
“Hato’o progresu servisu ba Primeiru-Ministru kona-ba projetu infraestrutura sira, iha pakote estrada lubuk ne’ebé tempu badak atu halo lansamentu. Projetu sira ne’e maka estrada Maliana Vila, Aileu bá Likidoe, no Manatuto Vila bá Laklo, no estrada ba Remexiu Vila,” Ministru hateten hafoin reuniaun ho Primeiru-Ministru, iha Palásiu Governu.
Notísia relevante : ANLA emite ona lisensa ambientál ba projetu estrada Maliana
Projetu reabilitasaun estrada hirak ne’e hetan ona vistu hosi Tribunál Konta no Komisaun Nasionál Aprovizionamentu (CNE, sigla portuges) fó sai ona empreza ne’ebé sei ezekuta obra hirak ne’e.
“Prosesu konkursu ba projetu ne’e mós hotu ona, empreza manán-na’in CNA fó sai ona, ne’ebé projetu balun sei ezekuta hosi empreza nasionál, join ho empreza internasionál,” nia akresenta.
Governante ne’e dehan, reuniaun Konsellu Ministru ikus iha loron 07 juñu 2023 maibé servisu kontinua to’o Governu foun no sira tuir mai kontinua obra ne’ebé husik hela.
Projetu estrada hosi Manatuto Vila bá postu administrativu Laklo gasta osan hamutuk millaun $6,5, estrada hosi Aileu bá Likidoe millaun $24,2 no sidade Maliana millaun $21,2, ne’ebé sei ezekuta hosi empreza internasionál PT, Hutama Karya.
Jornalista : Antónia Gusmão
Editora : Julia Chatarina
