DILI, 25 maiu 2023 (TATOLI)—Vise-Ministru Interiór, António Armindo, informa, membru Polísia Nasionál Timor-Leste (PNTL) ne’ebé destaka iha postu administrativu Uatolari, munisípiu Viqueque seidauk retira.
“Membru sira nafatin deskata iha Viqueque, liu-liu iha fatin ne’ebé sempre akontese krime, sira halo serbisu hodi halo aprosimasaun ho komunidade, nune’e evita konflitu,” Vise-Ministru hateten hafoin relata situasaun jerál ba Primeiru-Ministru no Ministru Interiór, Taur Matan Ruak, iha Palásiu Governu kinta ne’e.
Notísia relevante : PNTL Viqueque kaptura joven rua tenta asalta karreta tula materiál eleisaun
Membru PNTL sira ne’e mak hanesan membru Unidade Espesiál Polísia (UEP), sub-unidade Batallaun Orden Públika (BOP) no Kompañia Operasaun Espesiál (COE, sigla portugés).
“Bainhira sira-nia misaun halo aprosimasaun ho populasaun iha ne’ebá loos ona no situasaun hakmatek ona maka foin bele retira mai Dili,” nia akresenta.
Governante ne’e subliña katak situasaun jerál iha territóriu Timor-Leste la’o di’ak no hakmatek, maski mosu kazu kiik sira iha Viqueque maibé PNTL destakadu to’o iha fatin akontesimentu no atua kedas.
“Seguransa ba eventu tinan ne’e nian di’ak loos kompara ho tinan 2022 ne’ebé ita realiza kampaña eleitorál hodi hili ita-nia Prezidente Repúblika. Ba ida-ne’e Primeiru-Ministru kontente loos no hato’o ba Komandante Jerál PNTL na’in-rua, membru PNTL tomak, no membru F-FDTL ne’ebé apoia durante festa demokrasia,” nia adianta.
Jornalista : Antónia Gusmão
Editora : Julia Chatarina
