Sentru Saúde Uatucarbau rejista moras ISPA 1.848 durante fulan-tolu
VIQUEQUE, 25 maiu 2023 (TATOLI)—Sentru Saúde postu Uatucarbau, munisípiu Viqueque rejista moras Infensaun Vias Respiratóriu Aguda (ISPA) hamutuk 1.848 durante janeiru to’o marsu 2023.
“Moras ho númeru a’as iha sentru saúde ne’e mak ISPA. Moras seluk ho númeru kiik, ami fó tratamentu ba pasiente sira ho antibiótiku. Moras ISPA ho númeru a’as tanba impaktu hosi rai-rahun no hemu bee la tasak, tanba ne’e moras,” Xefe Sentru Saúde Uatucarbau, Jeremias Mota, hateten ba Agência Tatoli, iha ninia knaar fatin, postu Uatucarbau, kinta ne’e.
Notísia relevante : Entre janeiru-abril: Ermera rejista ISPA 3.000, Dengue lima
Nia dehan, sentru saúde ne’e nia stock ai-moruk sufisiente hela hodi fó atendimentu ba komunidade ne’ebé mai konsulta, maibé iha difikuldade balun mak hanesan menus ba pesoál saúde atu fó atendimentu ba pasiente.
Moras rejistadu iha Sentru Saúde Uatucarbau durante fulan janeiru to’o marsu tinan ne’e mak hanesan ISPA mane 830 no feto 1.018, moras kulit mane 92 no feto 95, diareia akuta mane 56 no feto 47, pneumonia mane 21 no feto 23, diareia ho ran feto rua, scabies mane 27 no feto 44.
Moras rejistadu seluk hamutuk 1.918, kompostu hosi mane 812 no feto 1.106, enkuantu pasiente 4.300 konsulta ona iha Sentru Saúde Uatucarbau.
Daudaun iha médiku tolu, parteira haat, enfermeiru 11, asistente enfermeiru ida, dentaria rua, farmásia rua, analista ida mak fó atendimentu iha Sentru Saúde no Postu Saúde Uatucarbau.
Populasaun iha suku neen postu Uatucarbau hamutuk 10.863.
Jornalista : Vitorino Lopes da Costa
Editora : Julia Chatarina
