DILI, 26 maiu 2023 (TATOLI) – Governu liuhusi Programa Nasionál Dezenvolvimentu Suku (PNDS) apoiu ona zinku 31.080 ba uma-ka’in 259 iha suku Bemori.
Ofisiál Sénior Munisípiu Dili, Manuel Aparício Guterres, hatete kalén sira ne’e Ministériu Administrasaun Estatál fó ba família sira iha aldeia hitu iha Bemori, kada aldeia iha benefisiáriu 37, ho intensaun atu troka filafali zinku sira ne’ebé ferrujen ka aat ona, nune’e bele asegura sira husi udan no loron-manas.
“Kalén sira ne’ebé ita apoia ba komunidade iha suku Bemori ne’e, tanba sira ne’e prienxe kritériu sira mak hanesan uma ne’ebé atu hetan apoiu ne’e tenke benefisiáriu nian rasik, inklui rai ne’ebé harii uma ne’e tenke iha dokumentu ofisiál. Lista benefisiáriu sira ne’ebé hetan apoiu ne’e mai husi xefe aldeia sira, nune’e ekipa PNDS halo survey hodi haree katak benefisiáriu iha aldeia refere presiza duni kalén foun”, Manuel Guterres, dehan ba Tatoli, sesta ne’e.
Nia esplika katak levantamentu ne’ebé PNDS halo ne’e hamutuk ho xefe aldeia, nune’e bele garante katak abitante sira iha aldeia ne’e iha duni problema ho sira-nia uma.
Nune’e mós xefe suku Bemori, Cristalina de Oliveira, husu ba família 259 ne’ebé hetan ona apoiu zinku husi Governu ne’e atu uza duni ba nesesidade ne’ebé iha no labele simu tiha kalén sira ne’e depois halo fali buat seluk.
“Depois ami sei tun bá haree kalén sira ne’ebé ita-boot sira simu ona. Ami hakarak haree duni sira troka kalén sira ne’ebé dodok ona. Ha’u lakohi rona ema balun halo keixa hasoru sira katak kalén ne’ebé simu ne’e fa’an tiha fali”, nia salienta.
Autoridade lokál ne’e mós agradese ba Governu tanba realiza ona sira-nia programa hodi tulun komunidade sira ne’ebé hasoru difikuldade.
Abitante suku Bemori Domingos Aleixo sente satisfeitu ho ajuda ne’ebé Ezekutivu sira fó tanba kumpre nia promesa ne’ebé halo no nia realsa katak kalén ne’e sei uza tuir duni nesesidade família nian.
Jornalista: Tomé Amado
Editora: Maria Auxiliadora
