Timor Resources halo perfurasaun iha posu Lafaek finaliza ona
COVALIMA, 26 maiu 2023 (TATOLI)—Jerente Timor Resoruces, Filomeno Andrade, hateten Kompaña Internasionál Timor Resources sobu ona ekipamentu perfurasaun mina postu Lafaek iha suku Labarai, postu administrativu Suai, munisípiu Covalima, tanba perfurasaun finaliza ona.
Notísia Relevante: Progresu perfurasaun posu Lafaek to’o ona metru 2,900
“Ami oras ne’e daudaun kompleta ona perfurasaun posu Lafaek atinje ona alvu metru 3118. Ita bele hateten prosesu perfurasaun ami hetan mina deskoberta perfurasaun. Nune’e, ami gasta ona osan millaun $68 maibé parseiru hosi Timor Gap to’o agora seidauk hatama osan uitoan. Iha problema ho Timor Gap, bainhira la rezolve, ami tenke aruma mákina rai iha fatin ida,” Filomeno Andrade hateten ba Agência Tatoli iha postu Lafaek, sesta ne’e.
Maibé, nia dehan, presiza atu rezolve problema entre Kompaña Timor Resources ho Timor Gap, tanba durante prosesu perfurasaun posu Lafaek ne’e, kompañia gasta ona millaun $68 maibé Timor Gap seidauk fó osan, nune’e kompañia deside sobu mákina perfurasaun.
Tanba ne’e, kompañia Timor Resources sei hein governasaun foun hodi aprezenta fali rezultadu perfurasaun ne’ebé mak durante Timor Resources halo.
“Durante prosesu perfurasaun, kompaña Internasionál Timor Resouces hetan mina no gás liu-liu gás mak makaas tebes. Ami sei relata ba Governu foun hodi servisu hamutuk ho Governu foun, nune’e kontinua atividade perfurasaun ne’e ba oin nafatin hodi hetan nia rezultadu di’ak,” nia dehan.
Atividade perfurasaun durante ne’e akontese problema entre Timor Resources ho Timor Gap bazeia ba kontratu komersiál ne’ebé iha, bainhira despeza ne’ebé Timor Resources halo esplosaun liu millaun $55, tuir loloos Timor Gap tama ona ho sira-nia partisipasaun.
Tanba ne’e, kompañia deside sobu ekipamentu iha posu Lafeak tanba presiza atu rezolve problema kompaña Timor Resources no Timor Gap maibé to’o agora la konsege rezolve, nune’e kompañia sei hapara hala’o atividade perfurasaun.
“Hafoin ne’e, ami sei para atividade hodi hein rezolusaun bele hetan fundu hodi kontinua atividade refere. Atu hahú fali, depende rezultasaun solusaun ba problema agora iha ne’e,” nia dehan.
Aleinde ne’e, nia esplika, kompañia Timor Resources la tula sai ekipamentu perfurasaun importante oras ne’e daudaun rai hela iha Haemane hodi halo manutensaun, maibé ekipamentu ne’ebé tula sai ba Indonézia ne’e ekipamentu ne’ebé la’ós importante liu mak tula sai ba Indonézia.
Entertantu, kompañia Timor Resources sobu ona ekipamentu perfurasaun tanba kompañia finaliza ona perfurasaun iha posu Lafaek atinje ona nia alvu perfurasaun no profundidade 3118 metru.
Notísia Relevante: Aviaun VH-PUY hosi Austrália hatun ekipamentu perfurasaun posu Lafaek iha Covalima
Jornalista : Celestina Teles
Editór : Cancio Ximenes
