iklan

OPINIAUN

Ezersísiu sira iha períodu pós-eleitorál: Re-estruturasaun Órgaun Ezekutiva no Impaktu sira iha Estrutura Burokrátika

Ezersísiu sira iha períodu pós-eleitorál: Re-estruturasaun Órgaun Ezekutiva no Impaktu sira iha Estrutura Burokrátika

Hakerek na’in, Afonso Soares.

Timor-Leste nu’udar Estadu Direitu Demokrátiku ne’ebé kualkér relasaun, tantu privada no públika entre sidadaun sira no entre sira ho Estadu, nune’e mós organizasaun no funsionamentu Estadu nian rasik, sei hala’o ho baze ba Konstituisaun no ba Lei sira mak vigora (implementa) iha kontestu RDTL.

País sira iha mundu ne’ebé adota forma Governu “Repúblika”, reprezentante povu nian sei hili liuhosi sufrájiu ne’ebé universál, livre, iguál, diretu, sekretu no periódiku. Iha kontestu Timor-Leste nian, sufrájiu universál nu’udar prinsípiu fundamentál ida ne’ebé konsagra iha artigu 7/1, nu’udar mekanizmu formál no úniku ne’ebé eziste hodi hili membru órgaun soberania sira, hanesan Prezidente Repúblika no Parlamentu Nasionál, tuir kondisaun sira mak defini iha  artigu 76 no 93 iha Konstituisaun RDTL nian.

Ita hotu anota tuir esperiénsia, eventu demokrátiku ida-ne’e akontese sempre ezije atu halo ezersísiu oioin iha períodu sira, tantu pré-eleitorál no mós pós-eleitorál, aliás, atividade sira mak hala’o molok eleisaun, hanesan resenseamentu eleitorál, estabelesimentu sentru votasaun sira, konsolidasaun estrutura partidu polítiku sira, kampaña eleitorál, etc., no ezersísiu sira mak hala’o iha períodu hafoin eleisaun, hanesan negosiasaun polítika, formasaun Governu ho aprovasaun ba ninia programa, etc.

Ein jerál, períodu rua ne’ebé mak destaka iha leten, aleinde faktu sira mak temi ona, determina mós akontensimentu oioin iha aspetu sira seluk, entretantu, artigu ida-ne’e limita de’it atu fahe esperiénsia prátika balu, iha períodu pós-eleitorál nian, liuliu iha ámbitu re-estruturasaun orgánika ba órgaun ezekutiva nian (Governu) ho konsekuénsia sira mak  potensia bele akontese iha estrutura Governu atuál nian, tantu iha nível institusionál no individuál, tuir prioridade polítika Governu foun nian.

Formasaun ba Governu foun, pratikamente, hamosu re-estruturasaun iha orgaun ezekutiva nian. Tuir baze jerál Administrasaun Públika ne’ebé estabelese ona iha Lei 4/2021, loron 10 fulan-Marsu, órgaun ezekutiva Estadu kompostu husi Administrasaun Direta, Administrasaun Indireta, Administrasaun Autónoma, Administrasaun Independente no Setór Emprezariál Estadu nian.

Iha kontestu re-estruturasaun, teorikamente, bele mosu evolusaun oioin iha instituisaun sira iha Administrasaun Públika Estadu nian, hanesan i) kriasaun instituisaun foun ruma, liuhosi separasaun ba instituisaun sira balu ii) transformasaun diresaun nasionál/jerál balu ba Administrasaun Indireta (Institutu Públiku I.P., Empreza Públika E.P., no Fundasaun Públika) eh Sekretaria Estadu ruma no iii) extinsão ka halakon tia instituisaun, diresaun, departamentu eh unidade estruturál ruma hosi estrutura atuál órgaun sira ne’ebé integra iha administrasaun sira iha leten.

Situasaun sira iha leten, se ita koko atu haree iha kontestu, primeiru, bele haree atuál Ministériu Transporte no Komunikasaun, ne’ebé kria liuhosi separasaun ba estrutura Ministériu  Obras Públikas, Transportes no Komunikasaun, segundu,  EDTL, E.P., nu’udar transformasaun husi Diresaun-Jerál Eletrisidade no BTL, E.P., transforma hosi Diresaun-Jerál Água e Saneamento, diresaun rua ne’e antes integra iha estrutura Ministériu Obras Públikas, Transportes no Komunikasaun no, terseiru, halakon hosi estrutura orgaun ezekutiva nian, hanesan Ministériu Dezenvolvimentu no Reforma Institusionál, etc.

Mudansa sira mak akontese iha nível estruturál instituisaun sira Estadu nian, iha parte ida, mosu tanba kada partidu polítiku iha ninia prioridade polítika, ne’ebé fó-sai iha períodu kampaña eleitorál nian, ne’ebé ikus-mai, bainhira manan eleisaun, prioridade hirak ne’e mak sei sai programa Governu nian, atu implementa durante ninia mandatu polítiku no, iha parte seluk, misaun ba prestasaun beins no servisu ba públiku, kada Governu iha ninia estratejia ba implementasaun, nune’e funsaun no estrutura sira hosi orgaun ezekutiva ida no seluk, sempre iha karaterístika funsionál no estruturál balu ne’ebé diferente.

Tuir observasaun ba diskusaun informál sira iha ita-nia sosiedade, sirkunstánsia seluk ida tan ne’ebé ita anota iha kontestu re-estruturasaun mak forma ida hodi hatan ba kompromisu eleitorál liuhosi kriasaun espasu traballu, tantu administrativu, tékniku no mós polítiku. Oportunidade ida-ne’e, haree hosi polítika empregabilidade, iha ninia vantajen balu, entre sira seluk, kontribui ba redusaun taxa dezempregu. Maibé, públiku nafatin kestiona kona-ba falta seriedade ba aplikasaun prinsípiu sira, hanesan igualdade iha oferta no tratamentu, ekuidade, konflitu interese, proporsionalidade entre regalia sira no responsabilidade, etc., no   dala-barak, objetu hosi prestasaun beins no servisu ba públiku la-satisfás tuir espetativa povu nian.

Situasaun ne’e sai kestaun mai ita, iha ámbitu oinsá atu halo re-estruturasaun ida mak bele lori benefísiu aas liu kompara ho kustu iha aspetu hotu-hotu, hanesan empregabilidade ba sidadaun sira, retornu iha aspetu oioin ba instituisaun Estadu no satisfasaun hosi públiku ba prestasaun beins no servisus husi instituisaun sira Estadu nian.

Tuir diskusaun oioin iha forum formál no informál sira, ita anota, ema barak ne’ebé hela fora hosi sistema Estadu nian, fó-hanoin balu ne’ebé rasionál duni, iha ámbitu oinsá bele hatan ba aspetu sira iha leten, katak estudu eh análize kona-ba kustu no benefísiu nu’udar estratejia ida ne’ebé presiza halo antes opta re-estruturasaun ida ho kualkér natureza sira, hanesan temi iha leten. Situasaun ne’e, bainhira ita halo análize ba diploma legál sira ne’ebé Governu aprova no vigora ona, hanesan Dekretu-Lei 30/2020, loron 29 fulan-Juñu (Organizasaun Administrasaun Direta no Indireta Estadu) no Dekretu-Lei 16/2021, loron 15 fulan-Setembru (Baze Jerál sira ba Organizasaun Administrasaun Públika nian), estudu atu identifika nesesidade hodi kria instituisaun sira Administrasaun Indireta, nune’e mós atu hatene kustu no benesífiu ba estabelesimentu, nu’udar ezijénsia ne’ebé defini ona no sai hanesan padraun/indikadór, entretantu, infelizmente, iha prátika, situasaun hirak ne’ebé padronizadu ona ne’e, laiha ida mak observa nein buka promove ninia ezisténsia hodi garante implementasaun ida ne’ebé bele lori benefísiu di’ak liu ba públiku iha prestasaun beins no servisus, nune’e mós garante estabilidade ekonómika, polítika no bem-estar povu nian.

Evolusaun sira ne’ebé mosu iha ámbitu re-estruturasaun órgaun ezekutivu Estadu nian, aleinde lori impaktu iha nível institusionál (separasaun, transformasaun no extinsão instituisaun sira), evolusaun sira ne’e hamosu mós konsekuénsia direta iha nível individuál, hanesan tranzisaun funsionáriu públiku sira ba instituisaun seluk iha kazu extinsão, mobilidade pesoál, liuhosi transferénsia, destakamentu no rekizisaun ba funsionáriu públiku sira bainhira kria instituisaun foun, extinsão, nune’e mós iha kontestu transformasaun ba instituisaun sira, no cessação automátika/hakotu okupante husi kargu diresaun eh xefia sira bainhira kargu la eziste ka lakon hosi estrutura instituisaun nian, tuir sirkunstánsia ne’ebé defini ona artigu 16/1 al. c) hosi Dekretu-Lei 25/2016, loron 29 fulan-Juñu (Rejime kona-ba Kargu Diresaun no Xefia iha Administrasaun Públika).

Mekanizmu kona-ba cessação ida seluk, pratikamente, defini kedan iha parte dispozisaun  finál no tranzitória husi orgánika instituisaun ida-idak nian, ne’ebé determina katak ho implmentasaun ka entrada em vigor orgánika foun, determina automatikamente, cessação ba okupante kargu sira mak la eziste tan iha estrutura instituisaun nian.

Iha parte seluk, konsekuénsia husi re-estruturasaun iha nível individuál, liuliu ba okupante kargu diresaun eh xefia ne’ebé admiti liuhosi prosesu selesaun bazeia ba méritu, enkuantu kargu ne’ebé asumi sei mantein iha estrutura orgánika instituisaun nian no “la sofre mudansa ba dezignasaun diresaun eh departamentu no atribuisaun sira”, okupante bele mantein iha kargu to’o prazu nomeasaun iha selesaun pur méritu termina, pelu kontráriu, kualkér ajustamentu ida husi aspetu rua ne’e, konstitui nu’udar sirkunstánsia ida ba cessação automátika husi kargu, tuir rejime kona-ba Kargi Diresaun no Xefia iha Administrasaun Públika.

Forsa traballu setór públiku ka instituisaun sira Administrasaun Públika Estadu kompostu hosi funsionáriu públiku no funsionáriu kontratadu sira. Iha kontestu, setór públiku ne’e, funsionáriu kontratadu kategoriza ba i) kontratu administrativu provimentu tempu indeterminadu, ne’ebé kualifika nu’udar Ajente Administrasaun Públika no ii) kontratu traballu ho termo certo/tempu determinadu lakonsidera hanesan Ajente Administrasaun Públika, bazeia ba artigu 25 husi Estatutu Funsaun Públika. Ho evolusaun iha prátika jestaun rekursu umanu, instituisaun sira hamosu tan invensaun ida hodi hamosu tan modalidade kontratu ida, ne’ebé koñesidu ho “kontratu kazuál”, ne’ebé eziste númeru kontratadu barak, ho responsabilidade ba servisu ofisiál sira Estadu nian, maibé modalidade kontratu ida-ne’e seidauk iha ninia fundamentu legál no, ida-ne’e nia jestaun kompete ba instituisaun ida-idak, laiha rejistu nein jestaun iha no/ka hosi KFP.

Situasaun ida-ne’e konfigura/reprezenta tan konsekuénsia ida hosi re-estruturasaun orgaun ezekutiva nian, iha nível individuál, aliás, Governu foun ne’ebé iha prioridade polítika foun, bele iha poténsia boot atu la-garante sustentabilidade ba projetu sira ne’ebé ho rekursu/forsa traballu sira mak lakonstitui responsabilidade KFP nian, iha kontestu jestaun.

Impaktu sira hotu mak ita identifika hatudu katak iha nesesidade atu harii sistema ka mákina administrativa ida ne’ebé permanente no forte atu bele kontinua eziste maski ho evolusaun sira hosi re-estruturasaun no bele iha rezisténsia kontra influénsia polítika. Iha kontestu Timor-Leste, iha bele haree estrutura burokátika ne’e depende maka’as ba estrutura polítika, sein dúvida, tanba estrutura burokrátika ne’e harii hosi estrutura polítika, entretantu, ne’e dezafia ita atu oinsá hamosu paradigma foun ruma ho natureza opostu hosi modelu ne’e. Ho razaun ida-ne’e iha poténsia atu mosu risku oioin, hanesan estrutura burokrátika bele hola desizaun risku ruma hodi hala’o servisu sira ne’ebé la tuir koredór legál, ekonómiku, no aspetu esensiál sira seluk, simplezmente hodi hatán ba orientasaun polítika nian. Faktu sira ne’e bele kontribui ba politizasaun servisu públiku Estadu nian no estrutura burokrátika sei la-garante memória institusionál nian, iha ne’ebé bele fó-impaktu mós ba efisiénsia, produtividade no efetividade servisu instituisaun nian. Enfín, rekursu sira mak aloka no ezersísiu sira mak hala’o iha ámbitu governasaun nafatin la hatan nesesidade povu nian.

 

Hakerek na’in lisensiadu iha Direito husi UNTL/FUP no nu’udar Asesór Jurídiku Seniór iha KFP.

Referénsia sira husi artigu ida-ne’e:

  • Konstituisaun RDTL;
  • Decreto-Lei N.º 14 /2018 de 17 de Agosto Orgânica do VIII Governo Constitucional
  • Lei N.º 4 /2021 de 10 de Março Autoriza o Governo a legislar sobre as bases da organização da Administração Pública;
  • Dekretu-Lei N.º 25/2016, loron 29 fulan-Juñu (Rejime kona-ba Kargu Diresaun no Xefia iha Administrasaun Públika);
  • ANDRADE, José Carlos Vieira de, Dezembro de 2017, Lições de Direito Administrativo, 5.a Edição. Imprensa da Universidade de Coimbra;
iklan
iklan

Leave a Reply

iklan
error: Content is protected !!