DILI, 27 maiu 2023 (TATOLI)—Vise Prezidente Komisaun Nasionál Eleisaun (CNE), Domingos Barreto, hateten partidu polítika sira-ne’ebé la hetan asentu parlamentár sei laiha direitu atu shetan subvensaun públiku $4, maibé direitu ne’e fó ba partidu polítiku sira-ne’ebé hetan asentu parlamentár mak sei hetan subsídiu hosi Governu ne’e.
Notísia Relevante: Rezultadu kontajen finál iha STAE, CNRT hetan vitória iha Elpar 2023
“Partidu polítiku 12 seluk ne’ebé la liu barreira iha eleisaun parlamentár 2023 ne’e, sei la hetan subvensaun públiku $4 hosi Governu,” Vise Prezidente Komisaun Nasionál Eleisaun (CNE) ne’e hateten ba Agência Tatoli liuhosi telefónika, sesta ne’e.
Nia haktuir, só partidu lima ne’ebé liu bareira hanesan Partidu CNRT, partidu Fretilin, Partidu Demokrátiku (PD), partidu KHUNTO no Partidu Libertasaun Populár (PLP) mak iha direitu atu hetan subsídiu $4 kada votu hosi Governu.
“Partidu hirak ne’e bele hetan subvensaun públiku ka subsídiu $4 hosi Governu, tanba sira iha asentu parlamentar,” nia hateten.
Domingos Barreto hateten, partidu hirak-ne’e hetan subsídiu ne’ebé la hanesan, tanba subsídiu $4 ne’e multiplika ba totál votu partidu nian entaun CNRT mak sei hetan barak liu.
Partidu sira-ne’ebé hetan asentu parlamentár sei hetan subvensaun públiku $4, tanba bazeia ba Lei Nú. 6/2008, 16 abril, kona-ba kona-ba Rejime Jurídiku Finansiamentu ba Partidu Polítiku sira, iha artigu 12 kona-ba subvensaun públika, iha númeru 2 ne’e hateten valór globál hosi subvensaun 50% fahe hanesan ba partidu hotu-hotu ne’ebé hetan asentu parlamentár, restante 50% halo pagamentu ho proporsionál ba partidu polítiku sira.
Notísia Relevante: Rezultadu finál provizoriu: CNRT hetan kadeira 31, PLP kadeira haat
Jornalista : Osória Marques
Editór : Cancio Ximenes
