CNE fó oras 48 ba partidu polítika atu halo rekursu
DILI, 29 maiu 2023 (TATOLI)—Vise Prezidente Komisaun Nasionál Eleisaun (CNE), Domingos Barreto, hateten prosesu akta ba eleisaun parlamantár nian ne’e CNE sei fó tempu ba partidu polítiku sira atu halo rekursu.
Notísia Relevante: Rezultadu kontajen finál iha STAE, CNRT hetan vitória iha Elpar 2023
“Se laiha rekursu depois de oras 48 nia-laran, mak ita remete ba Tribunál Rekursu no iha Tribunál Rekursu mós loron rua tenke define no dekreta, nune’e bele fó sai ona rezultadu final ba,” nia dehan ba Agência Tatoli iha nia kna’ar fatin Colmera, Dili, segunda ne’e.
Tuir nia, durante oras 72 nia laran CNE realiza apuramentu nasionál hodi konfere akta rezultadu apuramentu hosi sentru votasaun 1.472, hodi verifika votu reklamadu 515, nune’e verifika no halo desizaun perante fiskál partidu polítiku sira-ne’e hodi atribui votu 351 ba partidu sira.
Hosi votu válidu 351 ne’e, CNE deside sai válidu ne’ebé destribui ba partidu CNRT hamutuk 191, partidu FRETILIN hamutuk 96, Partidu Demokrátiku hamutuk 26, Partidu Libertasaun Popular hamutuk 13, Partidu KHUNTO hamutuk sia (9), PUDD hamutuk ualu (8) , PVT hamutuk neen (6), Partidu UNDERTIM ida (1) no CASDT ida (1).
Hosi votu reklamadu hamutuk 515 ne’e, nia hateten, votu ne’ebé kontinua sai nulu ka inválidu hamutuk 158, votu rezeitadu hamutuk ida (1), votu branku hamutuk lima (5) no votu ne’ebé sai válidu hamutuk 351.
Prosesu apuramentu nasionál ne’e hahú iha loron 24 fulan-maiu tinan 2023 no enseramentu ne’e hala’o iha sábadu 27 maiu 2023.
Jornalista : Osória Marques
Editór : Cancio Ximenes
