COVALIMA, 29 maiu 2023 (TATOLI)—Institutu Apoiu Dezenvolvimentu Emprezariál (IADE), segunda ne’e, fó formasaun área pekuária ba grupu negósiu ne’ebé ho programa hanaran Kompetisaun Planu Negósiu Inovativu (KPNI) iha munisípiu Covalima.
“Formasaun ba ohin, ami foka liu iha área pekuária nian. Ne’ebé, ami sempre realiza ami-nia programa formasaun ne’ebé hanaran Kompetisaun Planu Negósiu Inovativu (KPNI),” Xefe IADE-CDE Munisípiu Covalima, Roberto Alvaro Gomes, hateten ba jornalista sira, iha salaun IADE Asurai, segunda ne’e.
Nia hateten, IADE hanesan instituisaun Autónoma tutela iha Ministériu Asuntu Ekonomiku no nia reprezenta iha munisípiu mak hanesan Centru Dezenvolvimentu Emprezariál (CDE).
Formasaun ne’e hala’o durante loron-rua no iha loron dahuluk ko’alia matéria kona-ba oinsá grupu sira buka sira-nia ideia negósiu ne’ebé viavel ba sira-nia atividade negósiu no ba loron daruak sei ko’alia karáteristika emprezáriu di’ak no loloos.
Ema-ne’ebé partisipa iha formasaun ne’e hosi grupu no individuál sira-ne’ebé iha inisiativa hodi foku liu iha área pekuária hanesan grupu ka ema haki’ak animál hanesan karau, fahi lokál no fahi Macau, manu lokál.
Aleinde ne’e, IADE Covalima fó formasaun ba grupu no pesoál sira-ne’ebe iha inisiativa, sira mós sei tuir kompetisaun hodi kompete iha nivél nasionál.
Partisipante Ezidio dos Santo reforsa hateteb, Institutu Apoiu Dezenvolvimentu Emprezariál (IADE) fó formasaun ida-ne’e hanesan parte-ida atu kapasita grupu negósiu sira, nune’e bele hasa’e liután koñesimentu.
“Maske ami tui formasaun loron rua de’it maibé ha’u sente sufisiente ba ami atu aprende, tanba grupu barak iha fatin hotu iha vontade atu haki’ak animál, maibé presiza hadi’a sira-nia ideia liuhosi formasaun, nune’e bele susesu ho di’ak liu,” nia dehan.
Programa IADE ne’e partisipa hosi partisipante na’in-22 ne’ebé mai hosi postu administrativu hitu iha Covalima ne’ebé foku liu ba grupu ka pesoál sira-ne’ebé haki’ak animál.
Jornalista : Celestina Teles
Editór : Cancio Ximenes
