MALIANA, 29 maiu 2023 (TATOLI)-Moras Infesaun Respiratóriu Aguda (IRA) no Moras Kulit hahú hosi fulan janeiru to’o abríl 2023 ne’e rejista aas iha sentru Saúde Komunitária Balibo, munisípiu Bobonaro.
Xefe Interinu Sentru Saúde Balibo, Napoleao Marques, konfirma, tuir dadus, pasiente ne’ebé sofre moras IRA hamutuk na’in 1,808 tuir kedas moras kulit 215, Diareia 112, ne’ebé rekolla mós hosi postu saúde komunitária sira.
Notísia relevante:Juñu-jullu sentru saúde Balibo rejista IRA 519
“Moras ISPA mak primeiru lugar. Kona-bá moras Infesaun Vias Respiratóriu nia sufisiente hela, tanbá baibain ami fó ai-moruk Paracetamól, fila ba uma depois hemu bee morna, depende ami haree ninia kauza, bainhira atu hetan tratamentu” Nia informa ba jornalista sira, iha kna’ar fatin, segunda ne’e
Atu prevene moras ne’e labele afeta beibeik ba komunidade sira, médiku ne’e mós orienta ona pesoál saúde sira atu halo promosaun saúde ba komunidade sira liuhosi programa vizita ‘Saúde na Família’ no programa Servisu Integradu Saúde Komunitária (SISCa, sigla portugés). “Atu nune’e komunidade sira bele hatoman aan moris ho saúdavel” médiku jerál ne’e esklarese.
Enkuantu durante halo tratamentu besik tama ona ba trimestre daruak ne’e sentru saúde komunitária la rejista pasiente ho idade labarik no adulta lakon vida.
Jornalista: Sergio da Cruz
Editór : Rafael Ximenes de A. Belo
