DILI, 29 maiu 2023 (TATOLI)—Vise Primeiru-Ministru no Ministru Planu no Ordenamentu, José Maria dos Reis, espera Governu foun mak realiza projetu investimentu kabu submarinu fibra ótika tanba mandata VIII Governu Konstitusionál atu ramata ona, enkuantu prosesu aprovizionamentu seidauk konklui.
“Kabu submarinu ninia prosesu la’o ona maibé iha hela Komisaun Nasionál Aprovizionamentu (CNA, sigla portuges), ita seidauk konklui maibé tempu la to’o ona, hein katak Governu tuir mai bele aselera tanba infraestrutura ida-ne’e importante aleinde Aeroportu Comoro, kabu submarinu ne’e mós importante,” Ministru José Maria dos Reis hateten iha Palásiu Governu, segunda ne’e.
Ho nune’e, nu’udar Prezidente Konsellu Administrasaun Fundu Infraestrutura (KAFI), governante ne’e relata ba Primeiru-Ministru, Taur Matan Ruak, katak Governu atuál labele realiza asina kontratu no avansa ba lansamentu fatuk dahuluk ba projetu investimentu ne’e.
“Foin lalais Primeiru-Ministru partisipa iha konferénsia Asosiasaun Nasaun Sudeste Aziátiku (ASEAN, sigla portugés) iha Indonézia, ne’ebé ita simu giaun ida hodi ita kumpre molok nu’udar membru plenu ASEAN, entaun iha ezijénsia lubuk ida ligadu ba infraestrutura,” nia akresenta.
Notísia relevante : Governu identifika Arbiru Beach hanesan pontu xegada ba kabu submarinu
Antes ne’e, Governu deside ona Arbiru Beach, iha Bebonuk, munisípiu Dili hanesan lokál ba pontu xegada kabu submarinu, nune’e daudaun prepara hela cable landing point ba aterrajen kabu, ne’ebé daudaun CNA loke hela konkursu públiku.
Governu prevee millaun $41,6 ba verba Fundu Infraestrutura iha proposta lei Orsamentu Jerál Estadu (OJE) 2021 hodi halo akizasaun ekipamentu informátika kabu submarinu.
Iha parte seluk, Governu Timor-Leste no empreza ASN iha maiu 2022 asina ona kontratu akizasaun no instalasaun ba ligasaun dijitál iha Timor-Leste, liuhosi kabu submarinu iha sidade Darwin no Port Hedland iha Commonwealth Austrália nian.
Projetu ne’e konta mós ho millaun $38,6, ho durasaun serbisu 01 jullu 2022 to’o 31 janeiru 2024.
Jornalista : Antónia Gusmão
Editora : Julia Chatarina
