STAE Manatuto: Eleitór 5.600-resin la ezerse direitu votu iha Elpar
DILI, 29 maiu 2023 (TATOLI)—Diretór Sekretariadu Tékniku Administrasaun Eleitorál (STAE), Mariano Natalino Soares, hateten eleitór iha munisípiu Manatuto ne’ebé la vota no ezerse sira-nia direitu votu iha eleisaun parlamentár 21 maiu 2023 ne’e hamutuk 5.600-resin.
Notísia Relevante: Distribuisan kadeira: CNRT 31, FRETILIN 19, PD 6, KHUNTO 5, PLP 4
“Ita Manatuto ne’e, ema ne’ebé la vota 5.600-resin. Maibé, votu dever síviku ema ida-idak nian maibé kona-ba edukasaun votante no edukasaun eleitorál, ita sempre tun fó ba sira. Agora, atu vota ne’e, ita labele obriga tanba atu vota ne’e dever síviku no morál ema ida-idak nian,” nia hateten ba Agência Tatoli liuhosi telefónika, domingu ne’e.
Nia dehan, mezmu eleitór barak mak la vota maibé taxa partisipasaun ba eleisaun lejizlativa 2023 atinje 84.59%.
“Agora, ita atu kompara ho eleisaun tinan liubá, ita STAE Manatuto iha taxa partisipasaun sa’e tanba iha eleisaun parlamentár ida-ne’e, ita atinje to’o 84.59%,” nia hateten.
Kona-ba eleitór ne’ebé la tuir eleisaun ne’e, nia dehan, ema la mai ka ba ne’ebé ne’e ida-idak nia privasidade no STAE labele hatene.
“Tanba, lei eleitorál la fó dalan ita atu hatene ema-nia privasidade, ita-nia dever morál mak kada períodu eleisaun ita tun hosi munisípiu to’o aldeia inklui eskola sira hodi fó edukasaun votante ba sira. Maibé, bainhira tempu atu vota ida-ne’e la’ós STAE mak hatene maibé ema ida-idak uza nia konxiénsia atu vota,” nia hateten.
Totál eleitór iha Manatuto hamutuk 36.547 iha postu administrativu Laclubar, Laclo, Barique, Laleia, Manatuto Vila no Soibada.
Jornalista : Osória Marques
Editór : Cancio Ximenes
