DILI, 30 maiu 2023 (TATOLI)–Partidu Congresso Nacional Reconstrução Timorense (CNRT) no Partidu Demokrátiku (PD) halo ona komunikasaun polítika relasiona ho rezultadu Eleisaun Parlamentár 2023 no formasaun Governu foun.
“Se povu fó ona fiar, ita labele husik hela povu nia fiar saugate de’it ne’ebé tenke fiar. Ami halo hela komunikasaun polítika, liu-liu ho ami-nia aliadu PD,” Sekretáriu Jerál partidu CNRT, Francisco Kalbuadi Lay, hateten liuhosi konferénsia imprensa iha sede partidu, Bairro dos Grilos, tersa ne’e.
Nia rekoñese, hanesan partidu tenke tuir prosedimentu hotu, ne’ebé prosesu foin to’o Tribunál.
“Kuandu hasai ona desizaun mós CNRT sei hein katak Prezidente Repúblika sei bolu partidu vensedór, hosi ne’ebá mak prosesu ne’e ba oin atu halo koligasaun ka saida, ida-ne’e depois Prezidente bolu tiha ami ba mak foin deside hodi ko’alia formasaun Governu,” nia akresenta.
Notísia relevante : Distribuisan kadeira: CNRT 31, FRETILIN 19, PD 6, KHUNTO 5, PLP 4
Biban ne’e, Sekretáriu Jerál lori partidu CNRT nia naran felisita partidu hotu ne’ebé mak partisipa ona iha Eleisaun Parlamentár 2023, ne’ebé hatudu ona rezultadu ho di’ak.
“Ba hirak ne’ebé hetan asentu iha parlamentár no ne’ebé la hetan asentu, ami hato’o parabéns ba hotu-hotu,” nia tenik.
Francisco Kalbuadi Lay klarifika mós katak lista estrutura IX Governu ne’ebé daudaun espalla iha rede sosiál ne’e la loos.
“Estrutura partidu seidauk tuur hamutuk no nein iha minutu ida hodi haree kompozisaun Governu nian oin nusa maibé ha’u hatene katak ema balun halo hela lista komposizaun Governu nian, piór liu scan tiha ha’u-nia asinatura, ida -e’e ha’u dehan falsu”, nia dehan.
Tuir nia, bainhira atu asume nu’udar membru Governu ne’e iha estatutu partidu nian hateten klaru katak desizaun prorogativu, katak iha kompeténsia Prezidente partidu no Sekretáriu Jerál, ne’ebé halo ona konsulta ho estrutura partidu nian.
Nune’e, Sekretáriu Jerál partidu husu atu públiku labele fiar lista estrutura IX Governu ne’ebé daudaun espalla barak iha rede sosiál no hein de’it lista ofisiál ne’ebé sei fó sai hosi partidu vensedór rasik.
CNE konklui prosesu apuramentu nasionál ho akta provizóriu hanesan, totál akta apurada hamutuk 1.472 (100%), eleitór rejistadu 890.145, eleitór ne’ebé tuir vota hamutuk 705.693, enkuantu taxa partisipasaun 79,28%, kompostu hosi feto 343.278 (48,64%) no mane 362.415 (51,36%).
Votu válidu 692.521 (98,13%), votu branku 2.698 (0,38%), votu nulu 10.387 (1,47%), votu rejeitadu 61 (0,01%), no votu reklamante 0.
Votu válidu ba kada partidu polítiku sira ne’ebé haktuir iha rezultadu provizóriu Eleisaun Parlamentar 2023 mak Partidu Dezenvolvimentu Nasionál (PDN) hetan votu 597 (0,1%), Partidu Libertasaun Popular Aileba (PLPA) 3.272 (0,5%), Partidu Libertasaun Popular (PLP) 40.720 (5,9%), Partidu Demokrátiku (PD) 64.517 (9,3%), Partidu Kmanek Halibur Unidade Nasionál Timor Oan (KHUNTO) 52,031 (7,5%), Partidu os Verdes Timorense (PVT) 25.106 (3,6%), Partidu Uniaun Demokrátiku Timor-Leste (UDT) 1.256 (0,2%), Partidu Unidade Dezenvolvimentu Demokrátiku (PUDD) 21.647 (3,1%).
Partidu Repúblikanu (PR) 1.558 (0,2%), Partidu Unidade Nasionál Democrática de Resistência Timorense (UNDERTIM) 023 (0,1%), Partidu Partidu Frente Revolucionária de Timor-Leste Independente (FRETILIN) 338 (25,8%), Partidu Conselho Nacional Reconstrução Timor-Leste (CNRT) 288.289 (41,6%), Partidu Centro Ação Social Democrata Timor-Leste (CASDT)170 (0,5%), Partidu Movimentu Libertasaun Povu Maubere (MLPM) 642 (0,1%), Partidu Sosialista Timorense (PST) 2.415 (0,3%), Partidu Demokrata Kristaun (PDC) 1.262 (0,2%), Partidu Assosiasaun Populár Monarkia (APMT)678 (1,0%).
Jornalista : Antónia Gusmão
Editora : Julia Chatarina
