DILI, 30 maiu 2023 (TATOLI) – Empreza Timorindo ne’ebé abandona tiha konstrusaun antigu Eskola Sekundáriu Tékniku-Vokasionál (ESTV) Hera durante fulan neen promete katak sei kontinua hikas fali projetu ne’e.
Diretór Nasionál Dezenvolvimentu Parke Eskolár (DNDPE), Agostinho Soares, haktuir Timorindo durante ne’e husik tiha ninia responsabilidade ba projetu konstrusaun ESTV Hera, tanba sira iha problema interna, maibé agora sira promete atu kontinua fali projetu ne’e iha semana oin.
“Ami la importa problema interna kompañia Timorindo nian, maibé ami hanesan projetu na’in ezije maka’as ba sira atu projetu ne’e tenke la’o, nune’e labele sakrifika fali Ministériu Edukasaun nomós estudante sira iha eskola refere, tanba durante ne’e ekipamentu ba eskola ne’e limitadu tebes”, Agostinho Soares afirma ba Tatoli, iha Vila Verde.
Dirijente ne’e relata katak depois Timorindo abandona tiha sira-nia responsabilidade durante fulan neen, sira husu atu estende tan tempu, maibé diresaun la konkorda tanba emperza la kumpre nia obrigasaun. Diresaun husu ba Timorindo atu kontinua lai sira nia serbisu iha semana oin depois maka bele ko’alia kona-ba estensaun.
“Nune’e kompañia refere konkorda no prontu asume hikas sira-nia responsabilidade iha semana oin ba projetu ne’e”, salienta.
Tuir responsavel, ho promesa ne’ebé empreza hato’o ona ba Governu, liuhosi DNDPE katak buat hotu sei la’o ho di’ak, nune’e to’o agostu projetu antigu ESTV Hera ne’e bele finaliza.
Diretór Agostinho Soares salienta mós katak nia parte halo mós sorumutu ida ho kompañia tolu seluk ne’ebé kaer Projetu Konstrusaun no Reabilitasaun ba eskola Vasco ne’e mós kategoria empreza abandona hotu sira-nia responsabilidade no agora kontinua fali ona obra.
“Ha’u husu ba kompañia tolu nia responsabilidade ba projetu ne’ebé sira kaer husi parte Manatuto katak buat hotu sira prepara ona no hein de’it atu kontinua, entaun ha’u sei haruka tékniku sira ba akompaña. Ba Eskola 4 Setembro iha Viqueque mós enjeñeiru husi kompañia ne’e dehan sira mobiliza ona materiál, agora servisu la’o ona, inklui Atabae mós iha ona prosesu konstrusaun nia laran”, realsa.
Notísia relevante: Dirijente Eskola ESG Hera halerik tanba konstrusaun paradu
Jornalista: Tomé Amado
Editora: Maria Auxiliadora
