DILI, 30 maiu 2023 (TATOLI) – Diresaun Nasionál Dezenvolvimentu Parke Eskolár (DNDPE) hosi Ministériu Edukasaun, Juventude no Desportu (MEJD) sei organiza formasaun ba grupu projetu konstrusaun no reabilitasaun infraestrutura edukativa (PKRIE) 2023 hamutuk 112 hodi hasa’e sira-nia koñesimentu sobre jestaun ba projetu sira ne’ebé sei la’o durante fulan neen.
Diretór Nasionál Dezenvolvimentu Parke Eskolár, Agostinho Soares, afirma MEJD identifika ona eskola 117 mak tama iha PKRIE no projetu ne’e halo tiha ona lansamentu hosi Governu.
Agostinho Soares esplika projetu ne’e atu tama ba prosesu transferénsia orsamentu ba kada grupu nia konta bankária, maibé molok atu hetan transferénsia osan sira sei tuir uluk formasaun bazeia ba matadalan ne’ebé define ona.
“Ita-nia grupu PKRIE 112 ne’e foun. Molok sira atu kontinua projetu 2023 nian, ita realiza uluk formasaun ida adekuada kona-ba oinsá sira bele hatene jere orsamentu Estadu nia, oinsá sira bele hatene halo relatóriu no oinsá sira bele iha responsabilidade atubele finaliza projetu ne’e tuir durasaun tempu ne’ebé termina ona?”, responsavel ne’e dehan iha Vila Verde.
DNDPE informa ona ba diretór edukasaun munisipál sira atu prepara grupu PKRIE sira ne’ebé tama ona iha lista, nune’e iha semana oin bele partisipa formasaun. Atividade ne’e sei partisipa hosi nivel eskolaridade hotu hahú husi edukasaun pré-eskolár to’o sekundáriu jerál no tékniku-vokasionál.
“Ita hakarak grupu 112 ne’e tenke tuir hotu atu sira bele hatene didi’ak oinsá lala’ok atu jere projetu ida to’o hetan ninia rezultadu”, realsa.
Projetu Konstrusaun no Reabilitasaun 2023 nian ne’e hetan ona revizaun kona-ba matadalan sira atu labele taka dalan ba servisu sira ne’ebé ezije progresu, maibé oinsá atu hatudu ninia kualidade. Matadalan ne’e hetan aprovasaun husi Ministru Edukasaun no agora despaxa ona ba Gráfika Nasionál atu públika iha Jornál Repúblika. PKRIE ba eskola 117 ne’ebé sei hahú iha tinan ida ne’e ho orsamentu hamutuk millaun $15.
PKRIE hahú iha 2021 ho objetivu atu halo reabilitasaun no konstrusaun ba estabelesimentu edukativu iha territóriu nasionál, nune’e MEJD no BNCTL iha tinan kotuk asina ona akordu kooperasaun ba dezenvolvimentu infraestrutura edukativa 202 ho sala-de-aula hamutuk 657 ho ninia orsamentu liu millaun $20.
Notísia relevante: Eskola neen ne’ebé tama iha PKR hasoru difikuldade
Jornalista: Tomé Amado
Editora: Maria Auxiliadora
