DILI, 31 maiu 2023 (TATOLI)—Xefe bankada CNRT iha Parlamentu Nasionál (PN), Deputadu Duarte Nunes, hateten pozisaun bankada CNRT nian nafatin prefere kandidadu komisáriu Komisaun Anti-Korrupsaun (CAC, siglá portugés) ema-ne’ebé imparsiál la afilia ba partidu polítiku ruma.
Notísia Relevante: Eleisaun komisáriu CAC foun bele kontinua iha lejislatura foun
“Uluk akontese ona, ita espera katak ba oin partidu seluk bele iha konxiénsia katak ita presiza duni ema-ne’ebé imparsiál laiha afiliasaun ba partidu ruma, nune’e ita bele haree katak nia sei halo serbisu ho imparsilidade, ida-ne’e mak durante ne’e ami ezije no ami sei mantein ami-nia posizaun,” Xefe bankada CNRT ne’e hateten ba jornalista sira iha PN, kuarta ne’e.
Tanba ne’e, nia dehan, bainhira iha lejislatura dalimak ne’e PN la konsege realiza eleisaun ba komisáriu CAC ne’ebé VIII Governu Konstitusionál aprezenta, no iha Governu foun mai bankada CNRT nafatin husu atu Governu foun mai aprezenta fali kandidatu ida-ne’ebé imparsiál.
“Karik sira seluk iha hanoin, hamutuk ita nafatin nomea komisáriu ida, ita bele lao, ne’e mak dehan konsensu ne’e,” nia hateten.
Deputadu Duarte, hateten to’o iha ne’eba sei haree no karik bele hetan apoiu hosi partidu seluk hodi bele halo nomeasaun ba komisáriu foun.
Mezmu nune’e, nia dehan, daudaun ne’e komisáriu laiha maibé akuzasaun ba kazu korrupsaun kontinua la’o nafatin hosi Ministériu Públiku bele prosesa nafatin.
Antes ne’e, Prezidente Parlamentu Nasionál, Aniceto Longuinhos Guterres Lopes, hateten eleisaun ba komisáriu CAC foun iha lejislatura dalimak ne’e la konsege realiza bele kontinua iha lejislatura foun mai.
“Bele, tanba se korum funsionamentu laiha,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira iha PN.
Nia dehan, daudaun ne’e meza seidauk bele prosede ajenda diskusaun alterasaun lei CAC iha plenária tanba inisiativa seidauk tama.
Entretantu, Komisaun A trata asuntu Justisa no Konstituisionál trata hela alterasaun lei CAC liu-liu matéria ba prienxe korum funsionamentu maibé inisiativa ne’e meza seidauk simu.
Enkuantu, meza PN ajenda ona iha plenária ba eleisaun komisáriu CAC liu dala neen ona maibé labele realiza tanba presiza korum funsionamentu Deputadu prezente na’in-49, no Deputadu maiória hosi bankada opozisaun liu-liu CNRT mak auzente iha plenária.
Antes ne’e mós, bankada CNRT hato’o ona pozisaun katak presiza diskute didi’ak kona-ba kandidatu komisáriu CAC ne’ebé Governu hato’o tanba presiza haree ema-ne’ebé independente hodi hala’o serbisu serbi instituisaun importante hanesan CAC, bankada CNRT mós hato’o sira-nia karta justifikasaun ba meza PN razaun sira auzente iha plenária.
Jornalista : Nelson de Sousa
Editór : Cancio Ximenes
