CNE Oé-Cusse observa materiál propaganda eleitorál la eziste iha fatin publiku
OÉ-CUSSE, 31 maiu 2023 (TATOLI) – Komisaun Nasionál Eleisaun (CNE, sigla portugés), Rejiaun Administrativa Espesiál Oé-Cusse Ambeno (RAEOA), identifika katak iha terrenu laiha materiál propaganda partidu polítiku hanesan bandeira no stiker eziste iha fatin publiku.
Diretór CNE Oé-Cusse, Tomas Oqui Meta, agradese ba líder partidu polítiku sira no eleitór sira-nia konsiénsia tanba kontribui hodi hasai materiál propaganda partidu polítiku sira-ne’ebé durante períodu tempu kampaña sirkula ona iha fatin publiku sira.
“Ami simu ona orientasaun hosi nasionál atu hamoos hotu materiál partidu sira-ne’ebé sei kontinua taka iha uma oin ka fatin publiku, maibé tersa ne’e, ami sai hahú hosi Pante Makasar balu ba sub-rejiaun Oésilo no Nítibe, observa maibé laiha, fatin hotu-hotu, hanesan bandeira, stiker la eziste iha uma no fatin públiku sira hanesan merkadu,” Tomas Oqui Meta, ba Agência Tatoli iha Oé-Cusse, kuarta ne’e.
“Ida-ne’e hatudu katak, líder partidu sira orienta idak-idak nia militante oinsá kumpre regra, katak iha tempu silénsiu ne’e iha loron 19 no 20 maiu ne’e hotu-hotu rai ona materiál partidu iha fatin, tanba ema konsentra atu partisipa vota iha loron 21 maiu liubá,” nia afirma.
Entaun durante CNE halo observasaun atu hasai maibé realizadade laiha, ida-ne’e hatudu katak partidu polítiku sira hatudu sira-nia disiplina no kumpre regra Estadu nian.
Notísia relevante: CNE rejista keixa rua durante kampaña eleitorál iha Oé-Cusse
Jornalista : Abílio Elo Nini
Editór : Evaristo Soares Martins
