MALIANA, 31 maiu 2023 (TATOLI) – Institutu Apoiu Dezenvolvimentu Emprezariál (IADE), kuarta ne’e fasilita formasaun kona-bá Buka Ideia Negósiu (BIN) ba partisipante joven hosi grupu negósiu hamutuk na’in-25 iha munisípiu Bobonaro.
Xefe IADE munisípiu Bobonaro, Elias Cardoso, hateten formasaun loron rua ne’e atu identifika partisipante sira-nia ideia ba planu negósiu inovativu ka lae no sei ko’alia kona-bá karaterístika emprezáriu di’ak no loloos.
Nia haktuir, planu ne’ebé antes ne’e grupu negósiu sira submete mai IADE ho ideia sira foka ba área pekuária hanesan hakiak manu lokál, broiler, fahi no balu iha área peska nian.
Notisia relevante: IADE fó formasaun área pekuária ba grupu negósiu iha Covalima
“Maibé peska ne’e la tama iha kritéria entaun ami iha formasaun loron rua ne’e oinsá nia bele muda ninia ideia ne’e tama iha área pekuária ninian, sira-nia ideia hirak-ne’e ami sei halo selesaun na’in hirak mak liu,” nia informa ba jornalista sira iha edifísiu IADE, bairru Maravilha, Maliana.
Enkuantu hafoin ida-ne’e rezultadu selesaun mak partisipante sira pasa sei tuir tán formasaun kona-bá Kompetisaun Ideia Negosiu (KIN) durante loron-lima hodi hahú idak-idak nia planu negósiu atu nune’e kompete iha kompetisaun refere.
“Sira halo planu negósiu, ami rekolla hotu tiha, depois sira halo tiha aprezentasaun iha munisípiu, sé mak liu mak partisipa kompetisaun iha nasionál,” nia dehan.
Formasaun ne’e foka liu ba área pekuária nian nu’udar faze preparasaun ida mós ba kompetisaun planu negósiu inovativu ne’ebé sei implementa iha tinan ne’e.
Enkuantu kompetisaun ne’e atu enkoraja juventude poténsia sira iha negósiu setór pekuária atu bele kontribui ba dezenvolvimentu ekonómiku ne’ebé dignu no sustentável iha Timor-Leste.
IADE nu’udar Institutu Autonómu ida-ne’ebé tutela ba Ministériu Koordenadór Asuntu Ekonómiku (MEKAE) ho papél prinsipál fó apoia serbisu ba asisténsia emprezariál, liuhosi programa formasaun ba kapasitasaun intelektuál no akompañamentu, akonselamentu emprezariál, hodi promove empreza mikro ki’ik médiu iha territóriu nasionál.
Liuhosi planu negósiu inovativu bele hasa’e kresimentu ekonómiku no aumenta ho dignu, sustentável ba Timor-oan hodi moris armónia, justu, prosperiedade no absoluta.
Notísia relevante: IADE realiza kompetisaun planu negósiu inovativu setór turizmu 2022
Jornalista : Sérgio da Cruz
Editór : Evaristo Soares Martins
