VIQUEQUE, 31 maiu 2023 (TATOLI)–Karreta truck ida lori sasán merkadoria hetan asidente iha área Lauai, postu administrativu Viqueque Vila, munusípiu Viqueque, iha kuarta ne’e, maizumenus tuku 01:30.
Xefe Unidade Tránzitu Polísia Nasionál Timor-Leste (PNTL) munisípiu Viqueque, Salvador Guterres, informa, karreta ne’e mai hosi Dili tula sasán kios atu bá postu Uatulari maibé to’o iha área Lauai maka baku fila.
“Bainhira to’o iha Beaço, patraun feto maka lori karreta ne’e to’o área Lauai, iha dalan ninin rai mamar halo karreta baku fila ba liman karuk,” Xefe Unidade haktuir ba Agência Tatoli, iha postu Viqueque Vila.
Notísia relevante : Truck baku fila iha área Buanurak rezulta ema na’in-tolu kanek
Nune’e, kondutora hetan kanek iha ain tuur parte loos no transporta kedan ba ospitál Referál Baucau.
“Kondutora ne’e ohin halo ona tratamentu ona ba ninia ain, maibé tanba raan sai maka’as, ita-nia pesoál saúde sira deside na’in ba karreta ne’e halo tratamentu iha Baucau,” nia relata.
Motorista ho identidade Alcina Freitas Canizio ho idade 40, hosi aldeia Dasuati, suku Afaloikai, postu Uatulari.
Daudaun ne’e karreta truck sei iha fatin akontesimentu, maibé iha karreta laran nakonu ho sasán kios.
Jornalista : Vitorino Lopes da Costa
Editora : Julia Chatarina
