DILI, 31 maiu 2023 (TATOLI)—Governu liuhosi reuniaun Konsellu Ministru (KM) aprova proposta tolu ne’ebé aprezenta hosi Ministru Obra Públika (MOP), Abel Pires da Silva.
“Projetu dahuluk kona-ba prosedimentu aprovizionamentu reabilitasaun estrada munisipál sira ho pakote II seksaun sidade Maliana Faze 1 ICB/087/MOP-2022, ho valór estimadu millaun $13,6,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Notísia relevante : Governu prepara lansa projetu reabilitasaun estrada iha munisípiu tolu
Iha biban hanesan, KM delibera hodi autoriza despeza ba kontratasaun konsultória ida ba jestaun projetu abastesimentu bee no saneamentu iha Dili Oeste, ho valór estimadu millaun $15,2.
Nune’e mós, ezekutivu sira autoriza hodi hahú prosesu aprovizionamentu no formaliza tuir kontratu públiku ezekusaun obra moderniza sistema abastesimentu bee no saneamentu iha sidade Lautém, Viqueque no Manufahi.
“Tanba ne’e, Konsellu Ministru autoriza despeza globál estimada millaun $66,83 ba prosedimentu aprovizionamentu ne’ebé sei halo iha lote tolu,” nia akresenta.
Lote 1 mak modernizasaun sistema públika abastesimentu bee no saneamentu ba sidade Lautém ho valór estimadu millaun $22,48, lote 2 moderniza sistema públika ba abastesimentu bee no saneamentu iha sidade Viqueque ho valór millaun $23,76, no lote 3 kona-ba moderniza sistema públika ba abastesimentu bee no saneamentu iha sidade Same ho valór estimadu millaun $20,59.
Jornalista : Antónia Gusmão
Editora : Julia Chatarina
