Postu saúde Buanurak rejista pasiente pozitivu tuberkuloze na’in-lima
VIQUEQUE, 31 maiu 2023 (TATOLI)—Ekipa saúde hosi postu saúde Buanurak, suku Uabubu, postu Ossu, munisípiu Viqueque durante halo screening móvel tama sai uma ho mákina x-ray konsege deteta moras tuberkuloze hamutuk lima.
“Daudaun ne’e pasiente sira tuir hela programa tuberkuloze durante fulan-neen hodi kombate moras ne’e,” Reprezentante responsável postu saúde Buanurak no atuál Enfermeira, Eufémia Esperança Belo Guterres, informa iha postu saúde, kuarta ne’e.
Tuir pesoál saúde ne’e, populasaun lokál tauk konsulta moras tuberkuloze, nune’e foin lalais iha programa móvel mak foin deteta.
“Ba pasiente sira ne’ebé tuir ona programa tuberkuloze, tenke konsumu ai-moruk loron-loron no labele kaer serbisu todan, tenke konsumu ai-han nutritivu hodi hasa’e imunidade. Bainhira ita rekupera ona pasiente sira hosi moras ne’e, labele halo serbisu todan hanesan halo natar no halo to’os, bainhira serbisu todan, sei hetan fali moras,” nia akresenta.
Notísia relevante : Servisu Saúde Viqueque rejista moras tuberkuloze 34 iha trimestre dahuluk
Nia dehan, tama juñu 2023, programa hasai raiu-x la móvel ona, maibé halo de’it iha Internamentu Viqueque, nune’e bainhira populasaun sira hakarak bele bá direita.
Servisu postu saúde Buanurak hahú hosi janeiru to’o maiu tinan ne’e rejista moras Infensaun Vias Respiratóriu Aguda (ISPA) hamutuk 443, moras seluk hanesan ain tuur moras, estomuk inklui emerjénsia hamutuk 154, inklui moras seluk hanesan diareia 43.
Pesoál saúde iha postu saúde Buanurak hamutuk lima, kompostu hosi parteira ida, enfermeira ida, saúde públika ida, farmasista ida no médiku ida.
Jornalista : Vitorino Lopes da Costa
Editora : Julia Chatarina
