VIQUEQUE, 01 maiu 2023 (TATOLI)—Ekipa hosi Institutu Apoiu Dezenvolvimentu Emprezariál (IADE) fó formasaun ba joven hosi munisípiu Viqueque hamutuk na’in-43 iha área pekuária inovativu, durante loron-rua (01 to’o 02 maiu).
“Objetivu formasaun ne’e atu motiva joven sira atubele investe iha área pekuária nian, ne’ebé sai inovativu hodi asesu ba merkadu nune’e bele hadi’a joven sira-nia ekonomia,” Vise-Prezidente kompetisaun planu negósiu inovativu hosi IADE, Juvinal Alves, informa iha edifísiu IADE, Beloi, kinta ne’e.
Formadór mai hosi IADE nasionál no partisipa hosi joven hosi postu lima iha Viqueque.
“Ita-nia joven sira iha territóriu Timor laran tomak hamutuk na’in-586 inklui munisípiu Viqueque ne’ebé rejista iha marsu 2023. Daudaun ne’e sira tuir ona formasaun, ami enkoraja sira atu hamosu ideia negósiu hodi implementa iha futuru mai,” nia akresenta.
Formandu sira sei partisipa iha kompetisaun negósiu inovativu, ne’ebé realiza hosi IADE iha outubru tinan ne’e.
Notísia relevante : IADE fasilita formasaun buka ideia negósiu ba joven 25 iha Bobonaro
Hafoin joven sira hetan hotu formasaun, sei halo selesaun ba sira-nia planu negósiu hamutuk 10 ne’ebé di’ak liu ba nasionál hodi kontinua formasaun no hahú implementa negósiu tuir padraun.
Tinan ida-ne’e kompetisaun negósiu foku liu ba setór pekuária hanesan hakiak fahi, bibi, karau no manu.
Iha fatin hanesan, Reprezentante joven hosi suku Bahalara Uain, Viqueque Vila, Aniceto Tilman Belo, sente haksolok bele hetan formasaun hosi IADE, ne’ebé kapasita joven atu investe iha negósiu.
“Ha’u sente kapasitasaun ne’e importante tebes ba ami. Ha’u-nia planu hakarak hakiak bibi tanba bibi ne’e fasil tebes ba ha’u hodi haki’ak. Bibi ne’e ita bele fa’an tomak, bele halo sate no ninia ten bele prodús sai adubu hodi fa’an fali ba grupu ortikultura sira. Ba kompetisaun maka ha’u lakon mós labuat ida tanba ha’u hetan ona koñesimentu hodi bele kria,” nia tenik.
Jornalista : Vitorino Lopes da Costa
Editora : Julia Chatarina
