VIQUEQUE, 01 juñu 2023 (TATOLI)—Inan isin-rua hamutuk 317 vizita ona Sentru Kuidadu Emerjénsia Obstétriku Neonatál Báziku (KEmon-B) munisípiu Viqueque, durante fulan-haat nia laran, hahú janeiru to’o abríl 2023.
“Durante fulan-haat nia laran, ami rejista ema vizita sentru KEmon-B partu bebe ho normál hamutuk 105, partu ho komplikasaun 20, inan isin-rua ne’ebé transfere ba Ospitál Referál Baucau hamutuk sia, inklui inan isin-rua ho kondisaun seluk, ho totál hamutuk 317,” Xefe Sentru KEmon-B Viqueque, Celestina Soares, informa ba Agência Tatoli, iha ninia knaar fatin, Sentru Saúde postu Viqueque Vila, kinta ne’e.
Sentru KEmon-B estabelese fasilidade partu, ne’ebé hetan apoiu hosi Programa Nasaun Unida ba Dezenvolvimentu (UNDP, sigla inglés), ne’ebé fó apoiu tebes pesoál saúde sira. Antes sentru ne’e seidauk establese iha Viqueque, inan isin-rua sira vizita ladún másimu maibé agora inan isin-rua vizita barak.
“Ami presiza pesoál saúde sira-ne’ebé serbisu iha KEmon-B hetan kapasitasaun atubele hasa’e koñesimentu hodi fó atendimentu ba ita-nia inan isin-rua sira iha munisípiu Vqueque bele di’ak nafatin,” nia akresenta.
Notísia relevante : Jullu-dezembru, inan-isin rua 144 partu iha Sentru KEmON-B Viqueque
Daudaun pesoál saúde ne’ebé serbisu iha Sentru KEmon-B kompostu hosi parteira ualu no médiku ida mak oras ne’e fó atendementu ba inan isin-rua sira.
“Inan isin-rua ho kondisaun anemia (menus ran) ami transfere ba Ospitál Referál Baucau tanba iha ne’e ami labele atende,” nia tenik.
Iha janeiru, partu bebe hamutuk 37 (mane 25 no feto 12), fevereiru bebe 27 (mane 11 no feto 16), marsu bebe 28 (mane 11 no feto 17) no abríl bebe 25 (mane 15 no feto 10).
Jornalista : Vitorino Lopes da Costa
Editora : Julia Chatarina
