DILI, 01 juñu 2023 (TATOLI) – Ministériu Edukasaun, Juventude no Desportu (MEJD), liuhosi Diresaun Nasionál Dezenvolvimentu Parke Eskolár muda sistema rekolla dadus ba eskola sira ne’ebé presiza hetan apoiu, liuliu atu tama ba projetu konstrusaun no reabilitasaun infraestrutura edukativa (PKRIE) ba fali edukasaun munisípál.
Diretór Nasionál Dezenvolvimentu Parke Eskolár, Agosto Soares, hatete antes ne’e serbisu refere halo husi edukasaun nasionál no iha tinan ne’e entrega ba fali Servisu Edukasaun Munisipál sira, tanba sira maka hatene liu kondisaun ne’ebé akontese iha terrenu, nune’e eskola sira ne’e bele hetan konstrusaun no reabilitasaun iha 2024.
“Ita hakarak halo buat balun diferente ho ida ne’ebé akontese ona iha tinan kotuk, tanba antes ne’e buat hotu nasionál mak foti hotu. Bainhira enjeñeiru sira tun bá terrenu hamutuk ho grupu PKRIE sira atu implementa projetu, mosu dezentendimentu entre Servisu Edukasaun Munisipál no nasionál”, Agostu Soares relata ba Tatoli, iha Vila Verde.
Nia dehan tinan ida ne’e muda ona sistema no dadus hotu kona-ba kondisaun eskola sira ne’ebé atu hetan konstrusaun no reabilitasaun ba tinan 2024 sei informa husi munisípiu sira depois maka enjeñeiru sira bá halo verifikasaun.
“Ami lakohi buat hotu ami mak halo sein koñesimentu husi diretór munisipál no inspetór sira. Bainhira ami iha ona terrenu atu implementa projetu sira ne’e maka sira foin rona, tanba ne’e maka ita hakarak hadi’a sistema ne’e atu labele repete erru hanesan”, afirma.
Bazeia ba mudansa sistema ne’ebé kria ne’e bainhira la’o ho di’ak, MEJD bele garante problema edifísiu eskola, sala aula no hariis-fatin iha eskola sira bele rezolve ona, nune’e bele haree fali ba nesesidade biblioteka no laboratóriu sira.
Nia esplika liután katak indikadór ba prosesu PKRIE ne’e ninia susesu maka eskola 202 ne’ebé tama iha projetu tinan 2022, tanba eskola kuaze 150-resin iha territóriu maka hetan ona inaugurasaun, “entaun presiza avansa tan ninia númeru projetu no to’o ikus maka bele hatún fali númeru projetu sira”, salienta.
Notísia relevante: Grupu 112 partisipa formasaun sobre jestaun ba PKRIE 2023
Jornalista: Tomé Amado
Editora: Maria Auxiliadora
