DILI, 01 juñu 2023 (TATOLI)—Sekretária Komisaun F trata asuntu Saúde, Seguransa, Sosiál no Igualidade Jéneru iha Parlamentu Nasionál, Deputada Helena Martins, parabeniza labarik sira iha Timor-Leste iha komemorasaun loron mundiál labarik ne’ebé ohin mundu tomak komemora, no husu ba inan-aman sira labele fó servisu todan ba labarik sira.
Notísia Relevante: CNCTI submete ona planu asaun nasionál traballu infantil ba MKAE
“Ohin, loron espesiál ba labarik sira hotu, nune’e hato’o parabéns ba labarik hotu. Kestaun Traballu infantil ne’ebé daudaun buras iha Timor-Leste, ita haree mós ba parte ekonómia família, tanba ne’e Governu hahú daudaun investimentu fó subsídiu oioin. Espera, família hotu-hotu bele kolabora ho Estadu liuliu kolabora ho ministériu edukasaun oinsá labarik sira tenke ba eskola no fó sira-nia tempu, fila mai uma família labele fó serbisu todan ba labarik sira,” Deputada Helena Martins hateten ba jornalista sira iha PN, kinta ne’e.
Nia dehan, subsídiu jerasaun foun espera Governu se de’it mak mai bele kontinua tanba ida-ne’e parte ida TL komesa investe tanba labarik hahú iha inan nia isin hetan ona protesaun ho ninia dezenvolvimentu ne’ebé di’ak.
“Tambá ne’e ita investe dadaun iha ona pilotu, la’ós subsídiu ne’e atu halo ema hola malu lais, maibé ne’e mós hanesan investimentu ida no espera Governu foun tuir mai bele kontinua implementa nafatin,” nia hateten.
Deputada Komisaun F ne’e dehan, aliened ne’e sira nia parte mós aprova ona lei protesaun ba labarik no joven iha perígu no hein katak Governu foun mai halo sensivilizasaun hodi proteje di’ak liután.
“Ami komisaun F halo tiha ona lei protesaun ba labarik no joven iha perígu, espera katak iha Governu sé de’it mak mai nia fó nafatin publikasaun ka sensibilizasaun ba família hotu-hotu iha Timor laran tomak, inklui sosiedade sira atu kolabora ho lei ne’e para ita bele ona hamenus violénsia ne’ebé hasoru labarik ki’ikoan sira,” nia hateten.
Nune’e, nia dehan, hahú fó direitu kontribui saida mak fó ba labarik sira tanba sira mak futuru nasaun Timor-Leste nian.
Iha komemorasaun loron internasionál ba labarik sira-ne’e, nia husu ba família no parte hotu iha sosiedade hapara agresaun ba labarik sira.
Notísia Relevante: CNCTI husu Governu foun fó prioridade ba traballu infantil
Jornalista : Nelson de Sousa
Editór : Cancio Ximenes
