DILI, 01 juñu 2023 (TATOLI)—Prezidente Komisaun Nasionál Kontra Traballu Infantil (CNCTI, sigla portugés), Aciceto Leto Soro, husu Governu foun mai atu fó prioridade ba asuntu traballu infantil tanba tuir peskiza ne’ebé mak CNCTI halo iha territóriu nasionál labarik halo traballu infantil ne’e 12,3%.
Notísia Relevante: Timor-Leste sei selebra “Loron Mundiál Labarik” iha RAEOA
“Tuir ita-nia peskiza ne’ebé mak halo iha 2006 ba labarik halo traballu infantil hotu-hotu 30 ba leten, pursentu ne’e hahú hosi 37- 45%. Hosi Munisípiu Aileu 45%, Dili 40%, Ermera iha 37%, Lautém 35%,” Leto Soro hateten ba Agência Tatoli, iha nia kna’ar fatin Hudi-Laran, Dili, kuarta (31 maiu 2023) ne’e.
Nia hatutan, munisípiu seluk ne’e menus hosi 20% maibé iha territóriu nasionál ne’e atinje 12,3%.
Tanba ho peskiza ida-ne’e, CNCTI rekomenda ba Governu tenke haree asuntu ida-ne’e hanesan perioridade nasionál ida, ne’ebé mak presiza tau prioridade iha ukun governasaun tuir mai.
“Tanba ne’e, ha’u rekomenda ba Governu tuir mai, dahuluk ita presiza aprova lista ka planu nasionál traballu infantil nian mak bele sai hanesan guia ida atu lori ita ba halo atividade ka programa ida-ne’ebé mak atu proteje servisu,” nia dehan.
Rekomendasaun daruakm nia dehan, presiza halo deskrisaun ba parte sira minstériu edukasaun nian, atu kontribui ba parte sira-ne’e.
“Ami-nia rekomendasaun mak Governu tenke tau perioridade, nune’e ita bele aselera prosesu ne’ebé mak ita ko’alia ho justisa sosiál. Ita planeia maibé seidauk hetan aprovasaun. Ita hatama ona ba ministériu asuntu akadémiku, iha tinan ida liubá, seidauk hetan aprovasau. Ita hein took rezultadu tanba seidauk aprova asuntu ne’e,” nia dehan.
Jornalista : Osória Marques
Editór : Cancio Ximenes
