DILI, 02 juñu 2023 (TATOLI)—Arsebispu Arkidioseze Metropolitana Dili, Don Virgílio Kardeál do Carmo da Silva, inaugura monumentu ‘Jesus sa’e ba lalehan’ iha foho Cacusa, ne’ebé lokaliza iha aldeia Lenuk-Hun, suku Camea, postu administrativu Cristo Rei, munisípiu Dili.
Don Virgílio hato’o parabéns ba sarani sira hotu, liu-liu Parokia Santa Teresinha do Menino Jesus, Bedois, tanba ohin bele marka tan istória furak iha foho Cacusa.
“Monumentu ne’ebé harii iha Cacusa ne’e nu’udar símbolu sarani Bedois no Timor ninian. Ita harii estátua laós tanba de’it hakarak halo virál, maibé ho razaun ida hakarak halibur ita hotu hamutuk deskobre Maromak nia di’ak liuhosi Jesus nia moris hias,” Don Virgílio, hateten durante serimónia inaugurasaun monumentu, iha foho Cacusa.
Notísia relevante: Foho CACUSA nakfilak sai monumentu “Jesus Sa’e Ba Lalehan”
Nia fó hanoin, atu sente Jesus nia di’ak nu’udar sarani mak tenke la’o tuir Jesus nia hahalok, hanesan hadomi ema seluk hanesan an rasik no hatene perdua.
“Nu’udar sarani, loron-loron ba misa hodi reza hela de’it maibé hahalok kontinua halo problema, ida-ne’e fiar ne’ebé maran. Hahalok sarani hatudu duni ita ne’e kristu nian mak buka hakiak sentimentu kristu, hanesan sente saida mak Jesus sente, haree ema kiak no halo sala nia hadomi no perdua,” nia dehan.
Hahalok hirak ne’e hanorin sarani sira hakarak halo buat di’ak ruma ba ema labele hanoin fali ema tenke halo di’ak fali.
“Basá ema ne’ebé atu selu o nia di’ak ne’e mak Maromak. Nune’e Maromak hanorin ita hatene hadomi, perdua sein rezerva, ida-ne’e mak realidade Maromak nia perdaun loos bainhira nia haraik ba ita ida-idak,” nia haklaken.
Don Virgílio realsa, liuhosi transformasaun foho Cacusa sai monumentu furak ne’e hanorin ba sarani sira atu atu hatene la’o hamutuk tanba bainhira la’o hamutuk unidade sei bele halo buat hotu.
“Klaru ita moris presiza osan maibé unidade boot liu osan, nune’e husu ita ba oin labele husik de’it monumentu ne’e mamuk maibé kontinua hamoris liuhosi ita hotu nia kontribuisaun, ita mak tenke sai Jesus nia ain, matan, lima, tilun ba ita-nia maluk no sosiedade hahú hosi ida-idaik nia família rasik kontinua mai vizita fatin ne’e hodi halo orasaun,” nia hameno.
Jornalista : Arminda Fonseca
Editota : Julia Chatarina
