Ministru Victor orienta ANPM halo mediasaun ho Timor GAP, E.P no Timor Resources
DILI, 02 juñu 2023 (TATOLI)–Ministru Petróleu no Minerál, Victor da Conceição Soares, hateten, nia parte iha semana rua liubá hasai ona despaixu ba Autoridade Nasionál Petróleu no Minerál (ANPM) hodi halo mediasaun ho Timor Gas no Petróleu, Empreza Públika (Timor GAP, E.P) no empreza Timor Resources.
“Ligadu ho problema entre empreza Timor Resources no Timor GAP, ha’u halo ona despaixu ba ANPM atubele halo mediasaun tanba ANPM mak uluk fó kontratu ba sira no kaer regulamentu sira hotu, ne’ebé daudaun halo hela mediasaun atubele armoniza sira-nia diferénsia interpretasaun ba lei kontratu ne’ebé parte rua halo,” Ministru Victor hateten hafoin ramata reuniaun ho Primeiru-Ministru, Taur Matan Ruak, iha Palásiu Governu, sesta ne’e.
Notísia relevante : Timor Resources haruka ona amostra mina posu lafaek ba Indonézia
Nia dehan, problema entre parte rua hanesan kestaun disputa ka diferénsia interpretasaun ba lei kontratu.
“Estadu daudaun ne’e haree katak sira (Timor Resources) halo ona sira-nia obrigasaun, kona-ba perfurasaun ba posu tolu iha Suai hotu ona no agora hein sira-nia relatóriu atu ANPM haree iha duni rezultadu posu tolu ne’e iha rezultadu viabilidade komersiál ka lae, se iha ita tama ba faze tuir-mai se laiha rezultadu entaun hotu ona,” nia akresenta.
Governante ne’e relata, tuir kontratu ne’ebé iha katak iha faze esplorasaun ne’e finansia totalmente hosi responsável empreza operadór maibé bainhira tama ona iha faze produsaun maka Governu bele investe ka tau osan liuhosi Timor GAP, E.P.
“Bazeia ba kontratu komersiál ne’ebé iha, bainhira despeza ne’ebé Timor Resources halo esplorasaun liu millaun $55, tuir loloos Timor GAP, E.P tama ona ho sira-nia partisipasaun,” Ministru esplika.
Tanba ne’e, Timor Resources deside sobu ekipamentu iha posu Lafeak tanba presiza rezolve problema entre parte rua maibé to’o agora la konsege rezolve, nune’e empreza hapara atividade perfurasaun no sobu ekipamentu iha área perfurasaun.
Antes ne’e, empreza Timor Resources halo perfurasaun iha rai-maran, iha posu Lafaek suku Labarai, postu administrativu Suai, munisípiu Covalima, ne’ebé hola parte iha posu ida Governu lansa konkursu públiku mina no gás hamutuk bloku 18, kompostu hosi tasi-laran 11 no rai-maran hitu, iha 03 outubru 2019.
Jornalista : Antónia Gusmão
Editora : Julia Chatarina
