Timor Resources haruka ona amostra mina posu lafaek ba Indonézia
COVALIMA, 26 maiu 2023 (TATOLI)—Kompañia Internasionál Timor Resources haruka ona amostra mina hosi posu Lafaek iha suku Labarai, postu administrativu Suai, munisípiu Covalima ba laboratóriu iha Indonézia hodi halo analiza.
Notísia Relevante: Timor Resources halo perfurasaun iha posu Lafaek finaliza ona
Jerente Timor Resoruces, Filomeno Andrade, hateten, amostra hosi posu mina rai-maran Lafaek ne’e, kompañia Timor Resources haruka ona iha semana kotuk fulan ne’e ba Indonézia atu halo analiza.
“Ia prosesu perfurasaun ne’e, ami hetan mina deskoberta iha perfurasaun ida-ne’e formasaun iha ne’e hanesan mina matan Bayu Undang. Presaun makaas tebes perfurasaun kompleta, ami hala’o ona teste no teste ne’e ami haruka ona ba laboratóriu Indonézia. Ami laran hasolok atu hato’o rezultadu teste bainhira rezultadu ne’e ami simu ona hosi Indonézia,” Filomeno Andrade hateten ba Agência Tatoli iha posu Lafaek, suku Labarai, sesta ne’e.
Durante prosesu perfurasaun mina posu Lafaek ne’e, fó korajen makaas ba kompañia internasionál Timor Resources tanba fó prefurasaun makaas tebes.
“Agora ami bele hato’o ho amostra ne’ebé iha, durante perfurasaun mina ida-ne’e fó korajen makaas no presaun boot tebes. Ami halo perfurasaun hanesan oil ho gás, perfurasaun tahu ne’ebé hatun ba rai okos, ami halo perfurasaun PPZ 17,” nia dehan.
Notísia Relevante: Progresu perfurasaun posu Lafaek to’o ona metru 2,900
Hafoin karuka amostra perfurasaun mina posu lafaek kompañia hein rezultadu, tanba kompañia haruka ona amostra, nune’e durante perfurasaun posu tolu iha munisípiu Covalima ne’e hetan mina no gás.
“Ami hein, ho ida-ne’e iha indikasaun katak bele iha no hetan rezultadu. Oras ne’e daudaun, ami haruka ba Indonézia, iha prosesu ami servisu hamutuk ho kompaña kontratór tolu. Ami laran haksolok, tinan hitu halo perfurasaun mina matan tolu iha rezultadu hodi hetan mina,” nia hateten.
Tanba, nia dehan, perfurasaun mina matan rua ba dahuluk ne’e, kualidade mina makaas no tebes tuir gravidade American Petroleum Institute (API) ne’e entre 41 to’o 54, ida-ne’e kualidade mina di’ak tebes.
Tuir planu, nia dehan, ba oin kompaña kontinua sei hala’o teste ho tan perfurasaun appraisiál posu tolu atu konfirma ida-ne’e, bainhira atu hala’o presiza tan osan.
Entertantu, iha loron 27 fulan-outubru 2021, Primeiru-Ministru Taur Matan Ruak ofisiálmente lansa perfurasaun dahuluk ba kontratu fahe produsaun iha posu Feto Kmaus, munisípiu Covalima ne’ebé hanesan perfurasaun mina dahuluk iha rai-maran hafoin tTimor-Leste Independénsia iha tinan 2002.
Notísia Relevante: Rezultadu teste sampel perfurasaun posu Feto Kmaus hatudu sinál pozitivu
Jornalista : Celestina Teles
Editór : Cancio Ximenes
