Rezultadu teste sampel perfurasaun posu Feto Kmaus hatudu sinál pozitivu
COVALIMA, 08 agostu 2022 (TATOLI)–Jerente Empreza Timor Resources, Filomeno Andrade, hateten Timor Resources simu ona rezultadu teste sampel perfurasaun posu Feto Kmaus aldeia Tabakolot, suku Debos, postu administrativu Suai, iha munisípiu Covalima hatudu sinál pozitivu.
Notísia Relevante: Timor Resources deside hapara atividade perfurasaun iha posu Feto Kmaus
Rezultadu sampel ne’e Timor Resources simu iha fulan kotuk tinan ne’e, ne’ebé Timor Resouces hato’o ona ba Autoridade Nasionál Petroleu no Minerál (ANPM) mak sei fó sai informasaun kona-ba rezultadu sampel ne’e.
“Rezulta teste sampel mai-ona iha fulan kotuk, ami simu nia-rezultadu amostra. Ha’u bele hato’o de’it katak iha sinál pozitivu maibé nia konteúdu ida-ne’e ANPM mak sei fó sai hosi rezultadu ne’e hatudu iha valór ekonómiku ka lae,” Filomino Andrade hato’o ba Agencia Tatoli, iha salaun administrasaun munisípiu Covalima, segunda ne’e.
Maibé, nia dehan, oras ne’e daudaun Timor-GAP haree hanesan ne’e sinál pozitivu, hafoin rezultadu mai ona Timor Resources sei hato’o informasaun no ANPM mak sei fó sai, tanba ida-ne’e la’ós kompeténsia hosi Timor Resouces atu fó-sai rezultadu teste perfurasaun ne’e.
Iha loron 27 fulan-outobru 2021, Primeiru-Ministru, Taur Matan Ruak, hala’o lansamentu perfurasaun posu Feto Kmaus iha munisípiu Covalima.
Notísia Relevante: Governu la hasai osan ba perfurasaun posu Feto Kmaus
Jornalista : Celestina Teles
Editór : Cancio Ximenes
