iklan

OPINIAUN

Senáriu no ai-sasiik formasaun Governu foun

Senáriu no ai-sasiik formasaun Governu foun

Memensio Sequeira Freitas.

Hosi Memensio Sequeira Freitas

Povu Timor-Leste ezerse ona sira nia direitu votu tuir data Eleisaun Parlamentár ne’ebé dekreta hosi Prezidente Repúblika iha loron 21 fulan-Maiu tinan ida-ne’e. Hosi totál eleitor hamutuk ema na’in-890.154 ne’ebé resensiadu iha STAE, votante sira hamutuk na’in 692.521 (77,80%) mak fó ona sira-nia votu ba partidu 17 ne’ebé konkorre iha iha Eleisaun Parlamentár 2023.

Hafoin apuramentu nasionál iha CNE hatudu loloos katak partidu CNRT sai nu’udar partidu vensedór iha eleisaun Parlamentár tinan ida-ne’e ho totál votu hamutuk 288.289 (41,63%) hodi hetan kadeira 31 iha Parlamentu Nasionál. Enkuantu, partidu FRETILIN sofre redusaun ba sira-nia kadeira hosi 23 iha Eleisaun Antsipada tuun ba kadeira 19, PD hetan aumenta kadeira ida ba kadeira neen (6), partidu KHUNTO konsege mantein sira-nia kadeira lima (5) no PLP sofre mós redusaun hosi kadeira ualu (8) ba kadeira haat (4).

Tuir rezultadu ida-ne’e, partidu CNRT iha direitu tomak atu forma Governu ho senáriu saida de’it mak nia hakarak.  Iha konstituisaun RDTL artigu 106 iha alinea 1 ne’ebé ko’alia kona-ba nomeasaun Governu nian hateten momoos katak Primeiru-Ministru hili hosi partidu ida-ne’ebé iha votu barak liu ka hosi aliansa partidu sira-ne’ebé iha nia ema barak iha Parlamentu no iha nomeasaun hosi Prezidente Repúblika, bainhira rona tiha partidu polítiku sira-ne’ebé iha reprezentante sira iha Parlamentu Nasionál.

Senáriu formasaun Governu  foun 

Tuir opiniaun públiku barak hateten, partidu CNRT sei forma Governu hamutuk ho Partidu Demokrátiku (PD) hodi bele garante estabilidade Governativa ho sustentasaun kadeira 37 iha Parlamentu Nasionál. Ba ida-ne’e, karik Cinta Lama Bersemi Kembali (CLBK), tanba ita haree katak iha ona sinál balun ba prosesu formasaun Governu. Sekretáriu Jerál PD (António da Conceição “Kalohan”) ba hasoru malu ona ho Sekretáriu Jerál CNRT (Francisco Kalbuady) nian hodi entrega moos karta “domin/pedidu) ida ba Avo Nana hodi hatudu kompromisu polítika boot hosi PD nian ho lema “Maubere Oan Prontu Servi” hamutuk ho partidu vensedór.

Normál iha palku polítika, katak partidu sira bele halo negosiasaun ba malu kona-ba ukun nian, basá, partidu sira iha responsabilidade morál no polítika ba rai ida-ne’e atu serve di’ak liután Estadu ida-ne’e tuir lejitimidade ne’ebé povu atribui ona ba sira iha eleisaun. La sees no la dook hosi aproximasaun polítika hosi PD nian, tuir loloos partidu CNRT bele forma mesak sira-nia Governasaun ho Governu minoritária. La’ós buat foun iha mundu polítika, iha rai barak halo buat ida-ne’e, basta hetan apoiu insidénsia parlamentár hosi partidu seluk iha Parlamentu Nasionál.

La’ós imposível ba líder boot hanesan Avo Nana (Xanana Gusmão) atu hetan apoiu ida-ne’e ba ninia governasaun. Ha’u fiar katak karik PD la tama iha Governasaun mós, sira sei apoiu programa no orsamentu ne’ebé CNRT sei aprezenta hodi bele pasa iha votasaun. Nune’e mós, partisu KHUNTO rasik deklara ona katak sira prontu apoiu partidu CNRT iha Parlamentu Nasionál ba povu nia moris di’ak. No, nune’e ka lae, ita hotu fiar katak FRETILIN no PLP bele fó mós sira-nia apoiu ba kestasaun sira interrese Estadu iha Parlamentu Nasionál, nune’e governasaun ida-ne’e bele dura to’o mandatu ramata. Hirak ne’e hotu tanba partidu sira sente iha responsabilidade ba votu ne’ebé povu fó ona ba sira no liu-liu vida Estadu nian tenke kontinua la’o ba oin.

Senáriu ida seluk ne’ebé ema uitoan liu mak ko’alia no ida-ne’e nia probabilidade ki’ik liu (bele atinje de’it zero vírgula pursentu), mak koligasaun entre partidu CNRT no partidu FRETILIN (50 acentos) iha Parlamentu Nasionál. Se koligasaun ida-ne’e konsege mak sei mosu buat di’ak barak tanba uniaun entre partidu no líder boot rua, hodi sira bele hatuur loos hela buat hotu-hotu iha rai ne’e molok entrega estafeta ukun nian ba jerasaun kontinuadór sira. Até iha ema balun fó hanoin katak koligasaun ida-ne’e sei bele aselera mós prosesu dezenvolvimentu ho porsaun ne’ebé boot, inklui esforsu ba dada kadoras mai Timor-Leste.

Iha polítika laiha inimigu nem amigu permanente, iha de’it mak interrese. No, se ida-ne’e akontese duni karik, nu’udar buat ida normál tanba partidu sira-nia interrese mak ukun hodi bele muda rai no povu ida-ne’e nia moris ba ida di’ak liután. Embora, ema uitoan de’it mak hein hela senáriu ida-ne’e maibé se ida-ne’e akontese duni mak fó kedas resposta ba espetativa povu barak nian durante ne’e, katak só líder nasionál sira hamutuk mak bele lori Timor-Leste ba oin ho fiar aan ba futuru ida buras liu.

Só ke, to’o agora daudaun ita seidauk rona informasaun klaru no definitivu hosi partidu vensedór kona-ba prosesu formasaun Governu dasiak nian, liu-liu informasaun ikus hosi avo Nana rasik. Karik CNRT sei hein validasaun hosi Tribunal Rekursu kona-ba rezultadu Eleisaun Parlamentár no nia publikasaun iha Jornál Repúblika?

Iha ona konferénsia imprensa dala rua hosi CNRT hafoin eleisaun remata, maibé konferénsia imprensa sira-ne’e seidauk fó anin fresku loloos kona-ba formasaun Governu. Hafoin konferénsia imprensa hamutuk ho Sekretáriu Jerál CNRT loron hirak liu ba, to’o agora avo Nana nunka mosu ona iha televizaun, nonook tiha ninian hanesan lia ida la kona. Ita lahatene, sá desizaun mak the master avo Nana sei foti bainhira mosu fila-fali iha ekraun televizaun nian relasiona ho formasaun Governu dasiak ida-ne’e, ne’ebé ita hotu hein hela ne’e.

Biar nune’e, hosi Jeju Koreia du Sul nian, anin ida huu hosi publikasaun jornalista portugés António Sampaio iha loron ikus liu fulan Maiu nian hateten katak Prezidente Repúblika José Ramos Horta hakarak atu Governu foun tenke toma pose ona iha loron 18 fulan-Juñu 2023, maibé tuir kalendáriu loloos ne’e iha 19  Juñu 2023. Publikasaun ne’e sita katak Prezidente Repúblika konsidera katak koligasaun entre CNRT no PD nu’udar koligasaun naturál ida no bele forma ona aliansa maiória ida iha Parlamentu Nasionál hodi bele hamoris Governu dasiak.

Deklarasaun Prezidente Repúblika nian kona-ba Governu foun ne’ebé sei toma pose iha loron 18 fulan-Juñu ne’e mosu tanba haree ba esperiénsia akumuladu sira entre kuadru no lideransa partidu rua nian, durante tinan hirak ne’e nia laran iha governasaun oioin komu iha Parlamentu Nasionál nia laran. Bele dehan mós katak deklarasaun ida-ne’e sai ona nu’udar lúz verde (lampu hijau) ida ba públiku iha Timór nia laran tomak kona-ba formasaun Governu dasiak nian. Hakarak ka lakohi, Governu foun tenke moris duni ona tanba eleisaun ida-ne’e ninia finalidade mak atu hamosu órgaun lejislativa ida ho partidu ka aliansa maiória parlamentár ida-ne’ebé ikus mai sei hamoris Governu ida. Dala ida tan, hamutuk ka la hamutuk ho PD, inklui ho partidu seluk mós, tuir lejitimidade ne’ebé povu fó iha eleisaun foin lalais, partidu CNRT iha direitu tomak atu forma Governu ho senáriu hotu-hotu ne’ebé nia hakarak.

To’o agora daudaun, mosu informasaun barak kona-ba kompozisaun Governu nian ne’ebé mosu liu-liu iha facebook. Iha ona lista tolu (3) diferensae kona-ba Membru Governu sira no ita la hatene ho serteza sé mak publika lista hirak ne’e hotu. Maibé, tenke lembra katak artigu 106 KRDTL iha ninia alineia 2 hateten katak Membru Governu sira seluk, Prezidente-Repúblika mak sei hili liuhosi Xefe-Ministru nia proposta. Se figura importante ida-ne’ebé sei asume kargu nu’udar Primeiru-Ministru de’it sei nonook to’o agora no la mosu tiha ona iha ekran televizaun, oin nusá mak lista sira-ne’e mosu uluk ona iha públiku? Maibé ita hotu fiar katak lista sira ne’ebé durante ne’e ita hetan, naran sira-ne’e balu duni mak sei nomeadu nu’udar Membru Governu dasiak nian.

Espetativa boot ne’ebé povu iha ba Governu dasiak ne’ebé sei lidera dala ida tan hosi Kay Rala Xanana Gusmão ne’e sei hadi’a duni povu nia moris, sei dada duni kadoras mai Timor-Leste hodi loke kampu traballu barak tan ba joven sira, sei hadi’a Lei no justisa ne’ebé durante ne’e la’o kadeik hela, no liu-liu atu lori duni povu ida-ne’e ba moris di’ak tuir mehi patriota sira-nian iha luta ba libertasaun pátria ne’ebé ita alkansa tiha ona.

Governu ida be mai ne’e, nu’udar Governu ida ideál liu tuir povu nia hakarak, basá, povu maiória fó ona konfiansa ba líder boot rezisténsia nian atu lidera Governu ida-ne’e liuhosi partidu CNRT. Se Povu nia lian Maromak nia lian mak ita hotu fiar katak Povu nia espetativa sira-ne’e hotu sei hetan resposta di’ak iha Governasaun tinan lima ne’e nia laran. Ita hotu hein!

*) Hakerek na’in nu’udar manorin ida iha Eskola Sekundária Jerál 12 de Novembru no hela iha Dili.

 

iklan
iklan

Leave a Reply

iklan
error: Content is protected !!