DILI, 04 juñu 2023 (TATOLI)- Eis membru Komité Sentrál FRETILIN (CCF, sigla portugés), José Agostinho Siqueira ‘Somoxto’ aprezenta proposta tolu iha reuniaun partidu FRETILIN nian.
Pedidu ne’e eis-membru CCF Somoxto aprezenta liuhosi enkontru avaliasaun, hodi husu demisaun ba estruturu atuál partidu FRETILIN nian, hanesan Prezidente partidu FRETILIN Francisco Guterres ‘Lú Olo’ no Sekretáriu Jerál Maria Alkatiri, demite aan hosi kargu.
Iha pedidu ne’e husu estruturu partidu Fretilin na’in-rua ne’e atu realiza konsgresu extraordinária no halo eleisaun direta nune’e bele eleje kompozisaun foun.
“Ohin ne’e hau aprezenta proposta ho konteúdu tolu, estrutura nia demisaun, kongresu extraordinária no eleisaun direta,” José Agostinho Siqueira ‘Somoxto’ hateten ba jornalista sira hafoin enkontru avaliasaun partidu FRETILIN nian ne’ebé mak hala’o iha Tower, Fatuhada, domingu ne’e.
Nia dehan, proposta ida-ne’e la’ós atu ameasa malu, maibé oinsá mak hotu-hotu hanoin ba dezemvolvimentu partidu FRETILIN ne’e manán fali eleisaun.
Nia hatutan, hanesan proponente nia parte propoin de’it maiboe depende ba estructura, sé sente dehan hotu-hotu hamutuk mak bele manán konserteza ke dalan mak ne’e.
“Solusaun ida digñu no pásifiku, dignifika parte a parte, ami ejize nafatin pontu tolu ne’e” Somotxo afirma.
Nia parte sente triste, tanba iha enkontru ne’e rasik proposta ne’ebé ni aprezenta ho pontu tolu lideransa Fretilin rejeita.
“Ha’u Triste mak proposta ne’e ohin ema hanesan la simu, ema tilun diuk hotu, lakohi rona no lakohi simu proposta ne’e,” nia kestiona.
Ho nue’e, Somoxto promete kontinua defende proposta ne’e to’o hetan espulsa nia.
Portavós partidu FRETILIN, José Manuel Fernandes ‘Nakfilak’ hateten, enkontru ne’e la ko’alia kona-ba demisaun ka espulsa ema ida, maibé enkontru ne’e diskute balansu FRETILIN iha eleisaun parlamentár 2023.
“Ami la deskuti kona-ba demisaun ka restruturasaun. Ne’e reuniaun traballu, ne’e la ko’alia órgaun CFF atu halo dilibersaun ruma, atu halo demisaun ka estrutura ka nein atu delibera ida-ne’e. Buat sira ne’e Komite Sentrál mak sei haree, Prezidente mak sei konvoka, ne’e kompeténsia Prezidente nian ,” nia dehan.
Notísia relevante: FRETILIN deklara simu rezultadu eleisaun parlamentár
Jornalista: Natalino Costa
Editór: Evaristo Soares Martins
