DILI, 05 juñu 2023 (TATOLI)—Partidu Congresso Nacional de Reconstrução Timorense (CNRT) ho Partidu Demokrátiku (PD), segunda ne’e, asina ona akordu formaliza koligasaun hodi forma Governu dasia.
Notísia Relevante: CNRT no PD halo ona komunikasaun polítika
Sekretáriu Jerál Partidu CNRT, Francisco Kalbuady Lay, hateten Partidu CNRT no PD iha entendimentu atu la’o hamutuk ho kadeira 37 iha Parlamentu maiória, nune’e Prezidente Partidu CNRT, Kay Rala Xanana Gusmão, mak sei lidera Governu dasaia sai hanesan Primeiru-Ministru..
“Ofisiálmente, ammi formaliza tiha ona iha ohin lorokraik. Ohin, ami mai iha ne’e atu reafirma ho karta ne’ebé iha 30 maiu Sekretáriu Jerál (Partidu Demokrátiku) lori ba iha partidu CNRT ho hanoin partidu rua ne’ebé mak hetan fiar hosi povu, no ohin lorokraik ami mai iha ne’e, reafirma katak partidu CNRT prontu halo koligasaun hamutuk. “Ita-boot sira rona durante kampaña, Primeiru-Ministru mak maun boot Kay Rala Xanana Gusmão,” Sekretáriu Jerál Partidu CNRT, Francisco Kalbuady Lay, hateten ba jornalista sira liuhusi konferénsia imprensa iha sede Partidu Demokrátiku, Colmera.
Nia dehan, biban ne’e ho partidu ofisiál ami entrega ona karta ne’ebé asina hosi Prezidente Partidu Partidu Congresso Nacional de Reconstrução Timorense (CNRT), Kay Rala Xanana Gusmão.
“Ho ha’u atan hanesan Sekretáriu Jerál, ohin reafirma malu tiha ona agora hein de’it Tribunál hato’o desizaun. Ami sei tur hamutuk entre partidu rua liuliu lidera hosi Prezidente Partidu rua, CPN, CDN sira ami bele haree hamutuk halo nusa mak programa partidu rua bele benefísiu ba povu,” nia dehan.
Tanba ne’e, nia dehan, partidu CNRT no PD mós tempu tuir mai sei diskute kompozisun membru Governu dasia ho mós programa sira.
“Ita hotu hatene katak prosesu ne’e hotu-hotu tuir lei. Ohin, ami partidu rua ne’e mai reafirma malu katak, ami prontu halo koligasaun. Maibé atu diskute kle’an liu, primeiru tenke hein desizaun hosi Tribunál ba votasaun foin daudaun, depois publika iha jornál repúblika, depois Xefe Estadu bolu partidu mais votadu no ami sei hato’o prontu halo koligasaun,” Kalbuady dehan.
Nune’e, tuir nia, klaru katak partidu CNRT no PD ne’e agora sai ida de’it atu prontu hamutuk serbi povu no nasaun ne’e.
Sekretáriu Jerál ne’e hateten, partidu rua ne’e la’ós foin mak serbisu maibé hamutuk dezde inísiu katak PD mak CNRT no CNRT mak PD.
Biban ne’e, Kalbuady kongratula militante no simpatizante liuliu partidu rua no estrutura tomak iha territóriu, no kongratula mós partidu 17 ne’ebé mak partisipa ona eleisaun parlamentár tinan ne’e.
Partidu CNRT mós hato’o felitasaun ba PD ne’ebé kompete iha eleisaun parlamentár aumenta tan kadeira ida.
Iha fatin hanesan, Sekretáriu Partidu PD, António da Conceição ‘Kalohan”, hateten ohin lorokraik halo reafirmasaun kompromisu ne’ebé mak partidu rua iha kampaña hato’o katak partidu rua ne’e hakarak hotu ba mudansa.
“Mudansa ne’e mak ohin konkretiza ho vizita ofisiál ne’ebé mak sekretáriu jerál CNRT mai sede PD, tambá ne’e mak ohin hanesan reafirmasaun ida ba partidu rua ne’e atu hahu fila-fali kompromisu anteriór atu la’o iha 2023,” nia dehan.
Nia lori estrutura PD agradese ba CNRT nia prontidaun simu PD nia desezu ne’ebé hato’o iha loron 30 maiu liu ba, no ohin halo troka nota korespondénsia hodi konfirma aktu polítiku.
Jornalista : Nelson de Sousa
Editór : Cancio Ximenes
