DILI, 05 juñu 2023 (TATOLI)—Diretór Servisu Munisipál Água, Saneamentu no Ambiente, Hermínio Moniz Ribeiro, konsidera lixu iha kapitál Dili kontinua nakonu tanba populasaun menus konsiénsia, maski ekipa saneamentu halo ona sira-nia serbisu.
“Ita hotu hakarak no hanoin atu kombate lixu, bele mai ho planu no programa di’ak maibé bainhira ita ema laiha konsiénsia ne’e susar atu kombate, daudaun ne’e lixu kontinua nakonu iha kapitál Dili, ida-ne’e la’ós jestaun mak ladi’ak maibé kauza menus ema-nia konsiénsia,” Diretór hateten iha suai room, Timor Plaza, segunda ne’e.
Nia dehan, daudaun iha karreta kamioneta 70 mak uza tula foer iha kapitál Dili maibé nafatin labele kobre lixu sira ne’ebé espalla.
“Goveru fasilita lixeiru iha fatin-fatin, komunidade balun soe lixu tuir regra tau iha lixeiru maibé balun soe namkari, entaun saneamentu sira labele foti hotu,” nia akresenta.
Notísia relevante :Produsaun lixu iha Dili kada tinan aumenta
Diretór relata, tuir peskiza iha kapitál Dili ema ida kada loron prodús lixu metade kilograma, nune’e ekipa saneamentu rekolla lixu hamutuk tonelada 240 kada loron.
“Ida-ne’e problema ba ita tanba ita halo jestaun lixu maibé ita la tau lixu tuir nia fatin, impaktu ba ita-nia ambiente. Lixeiru rasik iha pontu kolesaun hamutuk 200 iha kapitál Dili, maibé komunidade balun nafatin la tau lixu tuir nia fatin,” Hermínio Moniz preokupa.
Ba kestaun ne’e, Administrasaun munisípiu Dili halo ona kolaborasaun ho parseiru sira hanesan Ajénsia Kooperasaun Internasionál Koreia (KOICA, sigla inglés), Uniaun Europeia (UE) no Mercy Corps hodi implementa projetu lixu.
“Maibé resiklajen lixu ba kapitál Dili ne’e foin atinje 5% de’it, signifika lixu 95% ne’e ba hotu Tibar, nune’e husu ita hotu nia kontribuisaun atu kombate lixu tenke maihosi konsiénsia,” nia dehan.
Jornalista : Arminda Fonseca
Editora : Julia Chatarina
