DILI, 06 juñu 2023 (TATOLI)—Governu Alemaña apoia ona orsamentu ho montante €240.000 ($390.000) ba Centro Nacional Chega, Institutu Públiku (CNC, I.P sigla portugés) hodi hadi’a muzeu antigu Komarka Balide.
“Projetu atu re-dezenvolvimentu fali muzeu antigu Komarka Balide ne’e rasik loloos atu realiza iha tinan kotuk, maibé tanba iha dezafiu tranferénsia orsamentu hosi Alemaña mai Timor-Leste, entaun hahú fali iha tinan ne’e no sei ramata iha dezembru tinan 2024, tanba projetu ne’e ho durasaun tinan-rua,” Diretór Ezekutivu CNC, I.P, Hugo Maria Fernandes, hateten iha nia knaar fatin, Balide, tersa ne’e.
Nune’e, molok implementa projetu ne’e, CNC, I.P halo uluk atividade konsultasaun públika ho parseiru sira hanesan eis prizioneiru polítiku sira ne’ebé mak hamahan-an iha Asosisaun Ex-Prizioneiru Polítiku (ASSEPOL), vítima konflitu tempu pasadu, profesór no dosente hosi universidade sira iha Dili laran, inklui reprezentante sosiedade sivíl hodi aprezenta projetu foun kona-ba re-dezenvolvimentu antigu Komarka Balide.
“Ita hakarak re-dezenvolvimentu antigu komarka ne’e nu’udar muzeu, entaun konvida sira mai hodi rona sira-nia hanoin no ideia kona-ba projetu ne’e, liu-liu sira-nia hanoin kona-ba saida mak importante liuhosi kontíudu muzeu ne’ebé mak CNC hakarak dezenvolve,” nia akresenta.
Notísia relevante : CNC inaugura “Uma Memória Esperansa” ba vítima Alola iha Covalima
Diretór Ezekutivu dehan, iha re-zenvolvimentu antigu Komarka Balide ne’e sei hakerek mós istória ezisténsia sela ne’ebé dadur sira tama inklui sei halo entrevista ho sobrevivente sira hodi hato’o sira-nia sasin kona-ba sofrimentu ne’ebé enfrenta durante iha sela ne’e.
“Hosi testamuña hirak ne’e sei transforma ba iha formatu audiovizuál nune’e bele fasilita joven sira ka vizitante sira mai vizita atu hatene loloos kona-ba istória moris hosi sobrevivente sira liuhosi ezibisaun. Ida-ne’e mak objetivu importante hosi eventu ida ohin,” Hugo esplika.
Iha fatin hanesan, Antigu Prizoneiru Polítiku, Aquilino Guterres ‘Ete Uku’, sente kontente no agradese tebes CNC,I.P tanba iha ona hanoin kreativu hodi konsege lori ona Chega ba mundu internasionál ne’ebé motiva nasaun sira, liu-liu Alemaña konsege apoia orsamentu hodi re-dezenvolvimentu muzeu antigu Komarka Balide.
“Ida-ne’e di’ak ba jerasaun foun sira. Ita agradese ba CNC, I.P tanba bele konvense ona Governu Alemaña mai apoiu ita liuhosi re-dezenvolvimentu ida-ne’e, ne’ebé hanesan pasu importante ba ami prizioneiru sira ne’ebé uluk kastigu duni ami iha fatin ida-ne’e, hanesan eis prizioneiru suporta tebes ba projetu ida-ne’e,” nia tenik.
Aquilino Guterres konsidera polítika CNC,I.P re-dezenvolvimentu muzeu antigu Komarka Balide ne’e di’ak tebes tanba bele dezenvolve Timor-Leste nia istória luta nian.
“Tanba muzeu ne’e bainhira harii di’ak ona ema barak sei mai vizita hodi haree no rona istória loloos hosi luta nian. Liu-liu foin-sa’e sira tenke hatene istória luta nian tanba luta atu hetan ukun rasik-an ne’e la’ós fasil. Ha’u agradese tanba Chega bele promove ona istória funu nian, husu nafatin kontinua servisu tanba mundu kontinua la’o ba oin, ita mós tenke servisu lori istória funu la’o ba oin,” nia fó hanoin.
Jornalista : Arminda Fonseca
Editora : Julia Chatarina
